აშშ მიესალმება უკრაინის პარლამენტის მიერ მიღებულ კანონს ეროვნული უსაფრთხოების შესახებ. ამის შესახებ აშშ-ს სახელმწიფო დეპარტამენტის ოფიციალურმა წარმომადგენელმა ჰიზერ ნაუერტმა განაცხადა.
„მიღებული კანონი შეესაბამება დასავლურ პრინციპებს და უზრუნველყოფს უკრაინის შეიარაღებული ძალების ნატო-სთან ურთიერთქმედების გაფართოებას“, - აღნიშნა ჰიზერ ნაუერტმა.
აშშ-ს სახელმწიფო დეპარტამენტში ასევე განაცხადეს, რომ აღნიშნული კანონის იმპლემენტაცია, მათ შორის უშიშროების სექტორზე საპარლამენტო კონტროლის შემოღება და უკრაინის უშიშროების სამსახურის შესახებ კანონის მიღება გააღრმავებს უკრაინის ევროინტეგრაციის პროცესს.
„აშშ მხარს დაუჭერს უკრაინას თავდაცვისა და უშიშროების სფეროში რეფორმების გატარებაში, რათა გააძლიეროს უკრაინის შესაძლებლობები დაიცვას თავისი ტერიტორიული მთლიანობა“, - ნათქვამია ჰიზერ ნაუერტის განცხადებაში.