ქუთაისის მერმა გიორგი ჭიღვარიამ პოლონეთის დელეგაცია მიიღო. ქალაქის მერმა და მერის მოადგილე ნინო თვალთვაძემ პოლონელ კოლეგებს ადგილობრივი თვითმმართველობის შენობაში უმასპინძლეს.

როგორც „ინტერპრესნიუსს“ ქუთაისის მერიიდან აცნობეს, პოლონეთის ქალაქ ჩესტეჰოვას მერი იაროსლავ მარზალეკი და ამავე ქალაქის მერიის თანამშრომლები გაცნობითი ხასიათის შეხვედრებს საქართველოში მეორე დღეა მართავენ.

„ქუთაისის მერმა სტუმრებს კულტურულ და ახალგაზრდული პროგრამების გაცვლებზე ესაუბრა, რაც ორი ქვეყნის მჭიდრო ურთიერთობებს კიდევ უფრო ეფექტურს გახდის. ამასთან ტურიზმის კუთხით ჩესტეჰოვას და ქუთაისს გარკვეული ინტერესები გააჩნიათ, რაშიც ხელს ორივე ქალაქს კოპიტნარის აეროპორტის დაბალბიუჯეტიანი ფრენები უწყობს“, - ნათქვამია მერიის მიერ გავრცელებულ ინფორმაციაში.

გიორგი ჭიღვარიამ სტუმრებს ქუთაისის ღირსესანიშნაობები დაათვალიერებინა და ტურისტული პოტენციალი გააცნო.