ტაილანდში გამოქვაბულში დარჩენილი მოზარდების ევაკუაცია 10-20 საათში განახლდება

ტაილანდის გამოქვაბულში დარჩენილი მოზარდებისა და მათი მწვრთნელის ევაკუაცია გაგრძელდება 10 ან მაქსიმუმ 20 საათის შემდეგ. ამის შესახებ სამაშველო ოპერაციის პრესსამსახურში განაცხადეს.

„ამ დროისთვის დღის განმავლობაში გამოყენებული ჟანგბადის ბალონების შეცვლა მიმდინარეობს, რომელთა განთავსება ევაკუაციის მარშრუტზე ხდება“, - აღნიშნეს პრესსამსახურში.

ბოლო ინფორმაციით, 23 ივნისის შემდეგ გამოქვაბულში მყოფი 12 მოზარდიდან, 4 უკვე ამოყვანილია. ყველა მათგანი ქალაქ ჩიანგრაის საავადმყოფოში გადაიყვანეს.