მთავრობის განახლებულ შემადგენლობასთან დაკავშირებით განხილვები მიმდინარე კვირაში დაიწყება, - ამის შესახებ ჟურნალისტებს ფრაქცია „ქართული ოცნების“ თავმჯდომარემ მამუკა მდინარაძემ განუცხადა. მისი თქმით, მინისტრობის კანდიდატთა კონკრეტული სახელები და გვარებიც მიმდინარე კვირაში გახდება ცნობილი.

მდინარაძემ ასევე ისაუბრა ოპოზიციის ბოიკოტზე და განაცხადა, რომ ოპოზიცია არის ტენდენციური, რადგან არ იცნობს კანდიდატების ხედვებს და ისე უცხადებს მათ უნდობლობას.

„ტენდენციურობაზე ისიც მიუთითებს, რომ არ იციან ადამიანების სახელები და გვარები, არ იციან პროგრამები და წინასწარ აცხადებენ, რომ მათ მხარს არ დაუჭერენ, ყველაფერი ცხადია, მათ აქვთ პოზიცია ტენდენციის თვალსაზრისით და არ აქვთ ხედვები, იქნებ ემთხვევა მინისტრობის კანდიდატების წარმოდგენილის ხედვები მათ ხედვებს. რაც შეეხება მინისტრობის კანდიდატებს, მიმდინარე კვირიდან უკვე გავივლით პრემიერთან ამ საკითხს, კონკრეტულ სახელებს და გვარებს მიმდინარე კვირაში გაიგებთ“, - განაცხადა მამუკა მდინარაძემ.

მომდევნო რიგგარეშე სხდომა 14 ივლისს გაიმართება, სადაც პარლამენტმა მთავრობის განახლებულ შემადგენლობას ნდობა უნდა გამოუცხადოს.