რამდენიმე თეატრმა მიიღო ზარი, რომ პაატა ბურჭულაძის წინააღმდეგ მიმდინარეობს გამოძიება და მათ უნდა შეეწყვიტათ პერფორმანსები მისი მონაწილეობით, - ამის შესახებ მსოფლიოს ერთ-ერთი ყველაზე გავლენიანი სააგენტოს, ასკონას ჰოლტის აღმასრულებელმა დირექტორმა მარკ ჰილდრიუმ განაცხადა.

პაატა ბურჭულაძის დისკრედიტაციის კამპანია ქვეყნის ფარგლებს გასცდა და უცხოურ თეატრებში გადაინაცვლა. თეატრებში საქართველოდან რეკავენ და დირექციას ატყობინებენ, რომ მათ მიერ მიწვეული არტისტის წინააღმდეგ სისხლის სამართლის საქმეა აღძრული.

ტელეკომპანია „რუსთავი 2“–თან საუბრისას მარკ ჰილდრიუმ განაცხადა, რომ მომხდარი უსამართლობაა, რომელმაც საოპერო მომღერლის კარიერა დააზიანა. „მე ვთვლი, რომ ეს სრული უსამართლობაა. ამბავი უცბად გავრცელდა კლასიკური მუსიკის სამყაროში. საბოლოო ჯამში ამ ყველაფერმა, რა თქმა უნდა, დააზიანა არტისტის კარიერა. მასთან ერთად ვმუშაობ 1984 წლიდან. ის მღერის და გამოდის მსოფლიოს უდიდეს თეატრებში, მონაწილეობს უდიდეს ფესტივალებში, ყველაზე ცნობილ დირიჟორებთან, არტისტებთან ის დღესაც არაჩვეულებრივად მღერის. ამ ბოლო დროს ლონდონის კოვენტ-გარდენის სცენაზე გამოვიდა, იმღერა მონტე კარლოს ოპერაში, სულ მალე პარიზის ოპერაში იმღერებს. მას, როგორც საქართველოს მოქალაქეს, უამრავი რამ აქვს გაკეთებული მისი ქვეყნისთვის, როცა მისივე თანამოქალაქეები ასეთ ბრალდებებს უყენებენ, რა თქმა უნდა, ძალიან აზარალებს მის კარიერას და როცა ეს ყველაფერი მოდის მისი სამშობლოდან, სრულიად ამაზრზენია“, – განაცხადა მარკ ჰილდრიუმ.