რეგიონული პოლიტიკისა და თვითმმართველობის კომიტეტის თავმჯდომარე ზაზა გაბუნია კახეთის სოფლების მოსახლეობას შეხვდა.

როგორც „ინტერპრესნიუსს“ საქართველოს პარლამენტიდან აცნობეს, ზაზა გაბუნია ყვარლის მუნიციპალიტეტის სოფლებს ყვარლის მუნიციპალიტეტის მერ, როსტომ სესიაშვილთან, მაჟორიტარ პარლამენტის დეპუტატ გურამ მაჭარაშვილთან და საკრებულოს თავმჯდომარესთან დავით ქევხიშვილთან ერთად ესტუმრა.

სოფელ ზინობიაში გაეცნო გზის მოხრეშვითი სამუშაოების მიმდინარეობას, სადაც გზის რეაბილიტაციის შემდეგ, სოფლის მოსახლეობა უპრობლემოდ და კომფორტულად გადაადგილებას შეძლებს. ასევე, გაეცნო და დაათვალიერა სოფელ ბალღოჯიანთან მისასვლელი ცენტრალური გზის მოასფალტების მიმდინარე სამუშაოები. ზაზა გაბუნიამ მოსახლეობასთან შეხვედრების მნიშვნელობაზე ისაუბრა.

„მე ვაგრძელებ ჩვენს რეგიონებში, სოფლებში მოსახლეობასთან შეხვედრებს, მათთან საუბარს და ურთიერთობას. ეს რეგიონებთან მიმართებით პოლიტიკის განსაზღვრისას საუკეთესო გზაა პრიორიტეტების სწორად ჩამოყალიბებისთვის. მეორე მხრივ, მოსახლეობისთვისაც მნიშვნელოვანია, რომ ჩვენ, ხელისუფლება მათთვის უფრო ხელმისაწვდომი ვართ და მათი საჭიროებების შესახებ ხმა ასე უფრო ძლიერად ისმის", - განაცხადა ზაზა გაბუნიამ.