ზღვის უბნის დასახლების მაჟორიტარი დეპუტატი თამარ ტალიაშვილი წყალანირების შიდა ქსელის სარეაბილიტაციო სამუშაოებს რაიონის გამგებელ ირაკლი ხელაძესთან ერთად ადგილზე გაეცნო.

როგორც „ინტერპრესნიუსს“ თბილისის საკრებულოდან აცნობეს, მიმდინარე სამუშაოების შედეგად, ზღვის უბნის დასახლების მე-11 მიკრორაიონის მე-2 კვარტლის, 28-ე და 28-ე (ა) კორპუსის მცხოვრებლები განახლებულ მიწისქვეშა კომუნიკაციებით ისარგებლებენ.

თამარ ტალიაშვილის თქმით, მიწისქვეშა კომუნიკაციების პრობლემა წლების განმავლობაში აწუხებდა და დისკომფორტს უქმნიდა მოსახლეობას. ახალი მიწისქვეშა ქსელებით კი ეს პრობლემა მოიხსნება.

„ზღვის უბანში აქტიურად მიმდინარეობს ინფრასტრუქტურული სამუშაოები, მათ შორის რეაბილიტაცია უტარდება მიწისქვეშა კომუნიკაციებს. ჩემთვის, როგორც არჩეული დეპუტატისთვის მნიშვნელოვანია ჩემი უბნის მოსახლეობის ყოველღიურ საჭიროებებზე ზრუნვა და მათი პრობლემების მოგვარება“, - განაცხადა თამარ ტალიაშვილმა.