სასაზღვრო პოლიციის ვერტმფრენის ავარიულად დაშვების შედეგად დაშავებული 5 პირიდან ამ დრომდე ოთხი თელავის კლინიკებში რჩება.

როგორც „ინტერპრესნიუსის“ კორესპონდენტი ადგილიდან იუწყება, დაშავებულთაგან ერთ-ერთს ღვიძლი აქვს დაზიანებული, რის გამოც ოპერაცია ჩაუტარდა.

ექიმების თქმით, ყველა მათგანის ჯანმრთელობის მდგომარეობა დამაკმაყოფილებელია და შესაძლოა, ორი პაციენტის გაწერა დღესვე მოხდეს.

რაც შეეხება მეხუთე დაშავებულს, ის თელავში მდებარე ყამბარაშვილის სახელობის კლინიკიდან, ოჯახის მოთხოვნით, რეანომობილით თბილისში, ღუდუშაურის საავადმყოფოში გადმოიყვანეს. მას ლავიწის ძვალი აქვს მოტეხილი.

შსს-ს ინფორმაციით, 12 ივლისს, სასაზღვრო პოლიციის ვერტმფრენის ავარიულად დაშვების შედეგად 3 მფრინავი, 1 მესაზღვრე და 1 პოლიციის თანამშრომელი დაშავდა.