„არტარეა ფესტივალის“ ფარგლებში, შოვი ღონისძიებას „მუსიკა და პოეზია რაჭაში“ უმასპინძლებს. როგორც „ინტერპრესნიუსს“ „თიბისი ბანკიდან“ აცნობეს, დღეს შოვის ყოფილი პირველი სანატორიუმის ეზოში გოგი ძოძუაშვილი და რატი ამაღლობელი აუდიტორიის წინაშე ერთობლივი პროექტით „წრე“ წარსდგებიან. 90-იან წლებში შექმნილი კოლაბორაცია გოგი ძოძუაშვილის ელექტრონულ მუსიკას და რატი ამაღლობელის პოეზიას აერთიანებს.

„არტარეა ფესტივალმა“ 23 ივნისს რუსთავში აიღო სტარტი და 6 რეგიონში 6 სხვადასხვა ღონისძიებას მოიცავს. ფესტივალის კონცეფცია განსხვავებული ელემენტების ერთიანობის იდეას ეფუძნება, ასევე, ტრადიციული ხელოვნების თანამედროვე, ექსპერიმენტული მუსიკით გადააზრებას, რაც რეგიონში მცხოვრებ მოსახლეობას და ტურისტებს შესაძლებლობას მისცემს, შეეხონ ძველ და ახალ ქართულ ხელოვნებას.

„მომდევნო ღონისძიება - ალექსანდრე კორძაიასა და გიორგი ცაგარელის კამერული სიმებიანი ორკესტრის ერთობლივი კონცერტი - Kordz & Zagareli-Strings, 28 ივლისს, ბორჯომის პარკში ჩატარდება. 11 აგვისტოს კი, მესტიაში, სვანეთის მუზეუმში მიხეილ კალატოზოვის ფილმის „ჯიმ შვანთე“ მუსიკალური პრემიერა შედგება. „არტარეა ფესტივალი“ 22 სექტემბერს თელავში დასრულდება, სადაც ექსპერიმენტული მუსიკისა და ფოლკის ინტერაქცია სახელწოდებით „სხვა კუთხით“ იქნება წარმოდგენილი. ფესტივალის ყველა ღონისძიებაზე დასწრება თავისუფალია. ფესტივალის მხარდამჭერია „თიბისი“. პროექტი Check in Georgia-ს ფარგლებში ხორციელდება“, - ნათქვამია „თიბისი ბანკის“ მიერ გავრცელებულ ინფორმაციაში.