იტალიელმა სამართალდამცველებმა მაფიოზურ საქმიანობაში ბრალდებულ სიცილიის ქალაქ პალერმოს ხორცის ბაზარზე წამყვან მოთამაშეს 21 მილიონი ევროს ოდენობის ქონება ჩამოართვეს. ამის შესახებ ქვეყნის ფინანსური გვარდია იუწყება.
პიეტრო ფორმოზო მაფიოზურ საქმიანობაში მონაწილეობის ბრალდებით მიმდინარე წლის აპრილში დააკავეს. გამოძიების ინფორმაციით, მან დიდძალი ქონება არა მხოლოდ ხორცით ვაჭრობით, არამედ ნარკოტიკებით ვაჭრობით დააგროვა.
პიეტრო ფორმოზო „კოზა ნოსტრას“ მიზილმერის ოჯახის ნდობით აღჭურვილ პირად ითვლება, მის ორ ძმას 1993 წელს მილანში ტერაქტის ორგანიზებისთვის სამუდამო პატიმრობა აქვს მისჯილი.
ფორმოზოსთვის ჩამორთმეულ ქონებას შორის 19 ავტომობილი, უძრავი ქონების 66 ერთეული, საბანკო ანგარიშები, სადაზღვევო პოლისები და რამდენიმე კომერციული ორგანიზაციაა. დაყადაღებულია უძრავი ქონების მსხვილი სააგენტო და კომპანია „ხორცის მეფე“, რომელსაც პალერმოს ბაზარზე წამყვანი პოზიცია ეკავა.