"ნაციონალური მოძრაობის" წევრები იმედოვნებენ, რომ აჭარის მთავრობის თავმჯდომარის პოსტზე ოპოზიცია ერთიან კანდიდატურას დაასახელებს. ამის შესახებ "ერთიანი ნაციონალური მოძრაობის" წევრმა გია აბულაძემ ბათუმში, პრეზიდენტის ადმინისტრაციის თანამშრომლებთან შეხვედრის შემდეგ ჟურნალისტებს განუცხადა.

მისი თქმით, საკითხზე კონსულტაციები გრძელდება.

"გრძელდება კონსულტაციები, ჩვენ უნდა დავდგეთ პარტიულ ინტერესებზე მაღლა და დავასახელოთ ისეთი კანდიდატი, რომელიც ანგარიშვალდებული იქნება ხალხთან და არა ბიძინა ივანიშვილთან. კონსულტაციების დასრულების შემდეგ ჩვენ ერთობლივად წარვადგენთ კანდიდატს", -განაცხადა „ნაციონალური მოძრაობის“ წევრმა გია აბულაძემ.

შეგახსენებთ, რომ „ქართულმა ოცნებამ“ აჭარის მთავრობის თავმჯდომარის პოსტზე თორნიკე რიჟვაძის კანდიდატურა წარადგინა.