აშშ-ის სახელმწიფო მდივანი მაიკ პომპეო მიიჩნევს, რომ დონალდ ტრამპსა და ვლადიმერ პუტინს შორის შეხვედრას დიდი მნიშვნელობა აქვს და აშშ-ს ინტერესებს პასუხობს. ამის შესახებ ტელეარხი CNN იუწყება.
„მივიჩნევ, რომ მნიშვნელოვანია მათი შეხვედრა. დარწმუნებული ვარ, პრეზიდენტ ტრამპის შეხვედრა ვლადიმერ პუტინთან ამერიკისთვის უფრო ხელსაყრელ პირობებს შექმნის“, - განაცხადა აშშ-ს სახელმწიფო მდივანმა.
აღსანიშნავია, რომ პარასკევს აშშ-ს კონგრესში „დემოკრატიული პარტიის“ ლიდერებმა ვლადიმერ პუტინთან შეხვედრის გაუქმება მოითხოვეს მას შემდეგ, რაც რუსეთის დაზვერვის 12 თანამშრომელს ბრალდება წაუყენეს 2016 წლის საპრეზიდენტო არჩევნებში უცხოური ჩარევის საქმის ფარგლებში.
აშშ-სა და რუსეთის პრეზიდენტების შეხვედრა დღეს ფინეთის დედაქალაქში ჰელსინკიში გაიმართება. აღსანიშნავია, რომ დონალდ ტრამპისა და ვლადიმერ პუტინის პირველი პირისპირ შეხვედრა 2017 წლის 7 ივლისს შედგა „დიდი ოცეულის“ სამიტის ფარგლებში, რომელიც ჰამბურგში გაიმართა.