„ევროპული საქართველოს“ წევრმა ოთარ კახიძემ ტყიბულში, მინდელის შახტში დაღუპულთა ოჯახებს სამძიმარი გამოუცხადა, დაზარალებულებს კი სწრაფი გამოჯანმრთელობა უსურვა, - ამის შესახებ „ინტერპრესნიუსს“ „ევროპული საქართველოდან“ აცნობეს.
ოთარ კახიძის თქმით, სახელმწიფო ვალდებულია, რომ ყველა ამგვარი შემთხვევა სრულფასოვნად გამოიძიოს.
„ალბათ ვეღარც ვითვლით მერამდენე მსგავსი ტრაგედია მოხდა. ეს ყველაფერი სტატისტიკად იქცა, ჩვეულებრივი რუტინის ნაწილია. თითქოს ყურიც კი მიეჩვია. ამ დროს გამოძიების შესახებ საზოგადოება არანაირ ინფორმაციას არ ფლობს. თუ ვინმეს პასუხისმგებლობა იყო უსაფრთხოების ზომების დაცვა და ეს არ მოხდა, მაშინ უნდა დადგეს შესაბამისი პირების სისხლის სამართლებრივი პასუხისმგებლობის საკითხი. თუ ეს არავის ბრალი არ არის და უბრალოდ შახტზე უსაფრთხოების ზომების მიღება შეულებელია, მაშინ კომპანიამ არ უნდა ჩაუშვას სამუშაოდ მეშახტე ისეთ ადგილას, სადაც გაუმართლებლად მაღალია დაღუპვის რისკი. თუ მაინც ამას აკეთებს, ისევ სახელმწიფომ უნდა მოახდინოს რეაგირება. ვიდრე დავიწყებთ ევროპულ სტანდარტებზე საუბარს, ჯერ რა მექანიზმებიც გვაქვს ის უნდა გამოვიყენოთ, მაგრამ ამას არ აკეთებს მთავრობა და გაუგებარია რა მიზეზით“, - აცხადებს „ევროპული საქართველოს“ წევრი ოთარ კახიძე.