ოფიციალური რომი წლის ბოლომდე ევროკავშირის მხრიდან რუსეთის წინააღმდეგ დაწესებული სანქციების მოხსნის საკითხს დააყენებს. ამის შესახებ იტალიის ვიცე-პრემიერმა, შინაგან საქმეთა მინისტრმა მატეო სალვინიმ განაცხადა.
„ჩვენი აზრით, სანქციებს სარგებელი არ მოაქვს, მათ შორის არც იტალიური ეკონომიკისთვის. წლის ბოლომდე ჩვენ დავსვამთ ბრიუსელში საკითხს ამ არაეფექტური პოლიტიკის გადახედვის შესახებ“, - განაცხადა სალვინიმ.
მისივე თქმით, კულტურის, ვაჭრობის, მრეწველობისა და უსაფრთხოების სფეროებში რუსეთთან კარგ ურთიერთობებს იტალია უკვე დაუბრუნდა.
„იტალია - ევროპული ქვეყანაა, რომელმაც სანქციების გამო ყველაზე დიდი ზარალი განიცადა. ყველასთვის ცნობილია, რომ იქ, სადაც იტალიამ დაკარგა, სხვა ქვეყნებმა, მათ შორის ოკეანეს გაღმა, სარგებელი ნახეს. სანქციებს სარგებელი არ მოაქვს, დღეში 7 მილიონი ევროს დაკარგვა კი სერიოზული ზარალია. ზუსტად ამდენს კარგავს იტალია ყოველდღიურად, სხვა ქვეყნები კი, ვინც ამ სანქციებიდან სარგებელს ნახულობენ, საკუთარ ბრუნვას ზრდიან“, - აღნიშნა იტალიის ვიცე-პრემიერმა.