დღეს ხელი ეწერება მემორანდუმს, რომელიც საქართველოსა და იტალიას შორის განათლებისა და კულტურის სფეროში მნიშვნელოვან თანამშრომლობას გულისხმობს, - ამის შესახებ განათლების, მეცნიერების, კულტურისა და სპორტის მინისტრმა მიხეილ ბატიაშვილმა პრეზიდენტის სასახლეში ჟურნალისტებს განუცხადა. ამ წუთებში პრეზიდენტის სასახლეში საქართველოსა და იტალიის პრეზიდენტების პირისპირ შეხვედრა იმართება.

"დღეს მართლაც მნიშვნელოვანი დღეა. ხელი ეწერება მემორანდუმს, რომელიც საქართველოსა და იტალიას შორის განათლებისა და კულტურის სფეროში მნიშვნელოვან თანამშრომლობას გულისხმობს, ასევე ქართველი სპეციალისტების იტალიაში ვიზიტს და პირიქით, იტალიელი სპეციალისტების საქართველოში ჩამოსვლას. ეს ძალიან კარგი მაგალითია იმისა, კულტურისა და განათლების სფეროში როგორ შეიძლება განვახორციელოთ წარმატებული პროექტები, როგორ მივიღოთ უფრო მეტი კვალიფიციური სპეციალისტი, რომლებიც იტალიის საუკეთესო ცენტრებში გაივლიან გადამზადებას. ეს ყველაფერი თავისთავად აისახება საქართველოზეც, სადაც გვეყოლება მაღალაკვალიფიციური საერთაშორისო დონის სპეციალისტები", - განაცხადა ბატიაშვილმა.