საქართველოს ეკონომიკისა და მდგრადი განვითარების სამინისტროში მწარმოებელი და იმპორტიორი კომპანიის წარმომადგენლებთან საყოფაცხოვრებო მოწყობილობების ენერგომარკირების საკითხზე შეხვედრა გაიმართა.
როგორც „ინტერპრესნიუსს“ ეკონომიკისა და მდგრადი განვითარების სამინისტროდან აცნობეს, „ენერგეტიკული გაერთიანების“ დამფუძნებელ ხელშეკრულებასთან საქართველოს შეერთების შესახებ ოქმის თანახმად, საქართველოსთვის, როგორც აღნიშნული გაერთიანების წევრი სახელმწიფოსთვის, სავალდებულო გახდა მარკირების შესახებ 2010/30/EU ევროდირექტივის შესრულება, რომელიც ითვალისწინებს შესაბამისი კანონპროექტისა და 12 სხვადასხვა სახის საყოფაცხოვრებო ტექნიკაზე ტექნიკური რეგლამენტების შემუშავებას.
შეხვედრა მინისტრის მოადგილემ ირმა ქავთარაძემ გახსნა. მან ხაზი გაუსვა კანონმდებლობის შემუშავებაში კერძო სექტორის ჩართულობის მნიშვნელობას, რათა პროცესი გამჭვირვალედ წარიმართოს, კომპანიებს ახალი რეგულაციების შესახებ თავიდანვე ჰქონდეთ ინფორმაცია და მათი შენიშვნები თუ წინადადებები გათვალისწინებული იქნას.
ეკონომიკისა და მდგრადი განვითარების სამინისტროს ცნობით, სამუშაო ჯგუფის წევრებმა წარმოადგინეს ევროდირექტივის ძირითადი მოთხოვნები და აღსრულების ვადები, 5 სახის საყოფაცხოვრებო მოწყობილობის, მათ შორის კომბინირებული სარეცხი-საშრობი მანქანების, საშრობი მანქანების, ჭურჭლის სარეცხი მანქანების, მტვერსასრუტების, ელექტრონათურებისა და სანათების ენერგო ეტიკეტირების შესახებ მომზადებული ტექნიკური რეგლამენტების პროექტების პირველადი ვერსიები.
შეხვედრის დასასრულს აღინიშნა, რომ ტექნიკის ენერგო მარკირების თემაზე მსგავსი ტიპის შეხვედრები მომავალშიც გაგრძელდება, რათა კერძო სექტორი მაქსიმალურად ინფორმირებული და მომზადებული შეხვდეს რეგულაციების ამოქმედებას.