აშშ-ს სახელმწიფო მდივანი მაიკ პომპეო დარწმუნებულია, რომ რუსეთი მომავალშიც შეეცდება აშშ-სა და დასავლეთის სხვა ქვეყნების არჩევნებში ჩარევას. ამის შესახებ მაიკ პომპეომ ტელეარხ Fox News-სთვის მიცემულ ინტერვიუში განაცხადა.

„ღრმად დარწმუნებული ვარ, რომ რუსეთი მომავალშიც შეეცდება შეარყიოს და ძირი გამოუთხაროს დასავლურ დემოკრატიას. ჩვენ აშშ-ს მთავრობას ვხელმძღვანელობთ და ჩვენი პასუხისმგებლობაა ყველაფერი გავაკეთოთ, რათა მათ ხელი შევუშალოთ არა მხოლოდ ჩვენს არჩევნებში ჩარევაში, არამედ უფრო ფართო კონტექსტით ჩარევაში“, - აღნიშნა აშშ-ს სახელმწიფო მდივანმა.

როგორც ცნობილია, 2016 წლის აშშ-ს საპრეზიდენტო არჩევნებში რუსეთის ჩარევის საქმეზე გამოძიებას სპეცპროკურორი რობერტ მუელერი ატარებს. რუსეთის ხელისუფლება უარყოფს აღნიშნულ ბრალდებებს და მათ უსაფუძვლოს უწოდებს.