პარლამენტის ევროპასთან ინტეგრაციის კომიტეტის თავმჯდომარის თამარ ხულორდავას განცხადებით, მნიშვნელოვანი და სიმბოლურია, რომ პრემიერ-მინისტრ მამუკა ბახტაძის პირველი ოფიციალური ვიზიტის ადგილად სწორედ ბრიუსელი შეირჩა.
დეპუტატის შეფასებით, პრემიერ-მინისტრის რანგში მამუკა ბახტაძის პირველი ვიზიტი ბრიუსელში წარმატებით მიმდინარეობს.
„ნატო-ს გენერალურ მდივანთან შეხვედრის შემდეგ, მამუკა ბახტაძე დონალდ ტუსკს შეხვდა. ევროპული ინტეგრაცია ჩვენი უკეთესი მომავლის, მშვიდობისა და განვითარების საფუძველია. ტუსკის განცხადებით, საქართველო ევროკავშირის საიმედო და სანდო პარტნიორია რთულ რეგიონში, სადაც საქართველოს, როგორც კონსტრუქციული პარტნიორის როლი, უდიდესია. ასოცირების შეთანხმების საფუძველზე ჩვენს შორის თანამშრომლობა სულ უფრო ღრმავდება. ევროკავშირი მხარს უჭერს საქართველოს ტერიტორიულ მთლიანობას. რუსეთ-საქართველოს ომის შემდეგ 10 წელი გავიდა და ამ პერიოდში შთამბეჭდავია საქართველოს პროგრესი, სტაბილურ, დემოკრატიულ, დინამიკური ეკონომიკური გარემოს მქონე სახელმწიფოდ ფორმირების გზაზე. ძალიან კარგი სტარტია“, - განაცხადა თამარ ხულორდავამ.