2018 წლის ბოლომდე ვიტოვებთ დროს, რომ ჩასწორდეს ის ხარვეზები, რაც გენგეგმის დოკუმენტში იდენტიფიცირდება, -ამის შესახებ თბილისის მერის მოადგილემ, მაია ბითაძემ ჟურნალისტებს საკრებულოს კომისიების გაერთიანებული სხდომის დასრულების შემდეგ განუცხადა. როგორც ბითაძემ აღნიშნა, ოპოზიციის შენიშვნები აბსტრაქტულია.
"ის შენიშვნები, რაც ოპოზიციას ჰქონდა, იყო ძალიან აბსტრაქტული და სასაცილოც კი. გენერალური გეგმა არის დოკუმენტი, რომელიც ერთნაირად უნდა აწუხებდეს როგორც ოპოზიციას, ასევე პოზიციას და ტურისტსაც. ეს ქალაქი უნდა იყოს კომფორტული ნებისმიერი ადამიანისთვის, ვინც აქ ცხოვრობს. მუნიციპალიტეტმა "სითი ინსტიტუტთან" ერთად ძალიან ბევრი იშრომა ამ გენგეგმაზე და მიმდინარე წლის ბოლომდე დროს ვიტოვებთ, რომ ყველა ის ხარვეზი, რომელიც ამ ხნის განმავლობაში იდენტიფიცირდება, ზუსტად იქნას ასახული როგორც ზონალურ, ასევე ტექსტუალურ ნაწილში",- განაცხადა ბითაძემ.
შეგახსენებთ, რომ საკრებულოს გაერთიანებული კომისიების სხდომაზე გენგეგმის დოკუმენტს რამდენიმე საათის განმავლობაში განიხილავდნენ. საკრებულომ დოკუმენტი აგვისტოს ბოლომდე უნდა მიიღოს, 2019 წლის 1 იანვრიდან კი, ქალაქის განვითარება ახალი გენგემით უნდა დაიწყოს.