სერგო რატიანი - კომისიაზე ვხედავთ, რამდენად არასწორად იყო წარმართული ხორავას ქუჩაზე მოზარდების მკვლელობის საქმის გამოძიება

ხორავას ქუჩაზე მომხდარი მკვლელობის საქმეზე შექმნილი კომისიის მთელი მუშაობა აჩვენებს, რომ მაღალჩინოსნების, პროკურატურის და შინაგან საქმეთა სამინისტროს გამომძიებლებსა და პროკურორებს ძალიან სერიოზული პრობლემა ჰქონდათ, - ამის შესახებ "ევროპული საქართველოს" წევრმა სერგო რატიანმა განაცხადა, რომელიც არასამთავრობო ორგანიზაციების მოთხოვნას გამოეხმაურა იმის შესახებ, რომ ხორავას ქუჩის საქმესთან დაკავშირებით, მაღალჩინოსნების მიმართ საქმის ცალკე წარმოება უნდა დაიწყოს.

„კომისიის მთელი მუშაობა აჩვენებს, რომ მაღალჩინოსნებს, პროკურატურის და შინაგან საქმეთა სამინისტროს გამომძიებლებსა და პროკურორებს ძალიან სერიოზული პრობლემა ჰქონდათ და მათ მიმართ იკვეთება გარკვეული სახის პრობლემები", - განაცხაადა რატიანმა.

რატიანი მაღალჩინოსნების პასუხისმგებლობის საკითხზეც საუბრობს.

„კომისიაზე ჩვენ ვხედავთ და საზოგადოებაც ხედავს, რომ თუ რამდენად არასწორად იყო წარმართული გამოძიება, თუ რამდენი ფაქტი იყო დაფარული გარკვეულწილად. ჩვენ ვხედავთ იმასაც, რომ ფაქტობრივად, ორივე რეკომენდაცია, რომელიც ჩვენ გავეცით, გულისხმობდა იმას, რომ დანაშაული გარკვეულწილად იყო დაფარული. ერთ შემთხვევაში არ იყო აღძრული სისხლის სამართლის საქმე,მეორე შემთხვევაშიც არ იყო ბრალი წაყენებული და ეს ნიშნავს მხოლოდ იმას, რომ აქ იკვეთება სრულიად ცხადად მაღალჩინოსნების პასუხისმგებლობა", - განაცხადა რატიანმა.