ქეთევან ციხელაშვილმა ახალქალაქში სამოქალაქო თანასწორობისა და ინტეგრაციის სახელმწიფო სტრატეგიის ფარგლებში დაგეგმილი საინფორმაციო კამპანია გახსნა

შერიგებისა და სამოქალაქო თანასწორობის საკითხებში საქართველოს სახელმწიფო მინისტრმა ქეთევან ციხელაშვილმა ახალქალაქში სამოქალაქო თანასწორობისა და ინტეგრაციის სახელმწიფო სტრატეგიის ფარგლებში დაგეგმილი საინფორმაციო კამპანია გახსნა.

როგორც „ინტერპრესნიუსს“ სახელმწიფო მინისტრის აპარატიდან აცნობეს, საინფორმაციო კამპანია სახელმწიფო პროგრამებისა და სერვისების სამცხე-ჯავახეთის რეგიონში მცხოვრები ეთნიკური უმცირესობების წარმომადგენლების ინფორმირებას გულისხმობს. მომდევნო კვირის განმავლობაში მოსახლეობას მიეწოდება ინფორმაცია ჯანდაცვის, სოფლის მეურნეობის, სოციალური თუ ეკონომიკური პროგრამის შესახებ. შეხვედრაში მონაწილეობა მიიღეს შრომის, ჯანმრთელობისა და სოციალური დაცვის მინისტრის მოადგილემ თამილა ბარკალაიამ და გარემოს დაცვისა და სოფლის მეურნეობის მინისტრის მოადგილემ იური ნოზაძემ.

„საქართველო არის ქვეყანა, სადაც თითოეული მოქალაქე მიუხედავად ეთნიკური თუ რელიგიური კუთვნილებისა არის თანასწორი. თანასწორობა კი, გულისხმობს ჩართულობას და ინფორმირებულობას. სწორედ ამიტომ ჩამოვედით დღეს სხვადასხვა სამინისტროების წარმომადგენლებთან ერთად, რომ მოსახლეობას მივაწოდოთ ინფორმაცია იმ სარგებლისა და შესაძლებლობების შესახებ, რასაც სახელმწიფო სთავაზობს მათ. რეგიონში მცხოვრები ეთნიკური უმცირესობების წარმომადგენლების ინფორმირება და ინფორმაციის ხელმისაწვდომობის გაუმჯობესება, სახელმწიფოში არსებული სხვადასხვა პროგრამებისა და სერვისების შესახებ ცნობიერების ამაღლება - ეს არის საქართველოს მთავრობის ხედვა, სახელმწიფო პოლიტიკის ერთ-ერთი მთავარი პრიორიტეტი, რომელიც განსაზღვრულია, ასევე, „სამოქალაქო თანასწორობისა და ინტეგრაციის სახელმწიფო სტრატეგიასა და შესაბამის სამოქმედო გეგმაში. ეთნიკური უმცირესობების მიმართ სახელმწიფო პოლიტიკა, რომელსაც ჩემი უწყება უწევს კოორდინირებას, მიზნად ისახავს, საზოგადოებრივი ცხოვრების სხვადასხვა სფეროში ჩართულობით სამოქალაქო ინტეგრაციისა და თანასწორობის უზრუნველყოფას. შესაბამისად, ჩვენ ვგეგმავთ, რომ კამპანიის ფარგლებში მუნიციპალურ დონეზე, ნინოწმინდასა და ახალქალაქში, ეთნიკური უმცირესობების წარმომადგენლებით დასახლებულ პუნქტებსა თუ სოფლებში, თითოეულ ადამიანამდე მივიტანოთ ინფორმაცია - ის სარგებელი, რასაც სახელმწიფო თავის მოქალაქეებს სთავაზობს“, - განაცხადა სახელმწიფო მინისტრმა.

შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატის ინიცირებით და კოორდინირებით საინფორმაციო კამპანია უკვე ჩატარდა ქვემო ქართლის და კახეთის რეგიონებში. სამცხე-ჯავახეთის რეგიონში მოსახლეობასთან საინფორმაციო შეხვედრები ჯანდაცვის, ეკონომიკის, ფინანსთა და გარემოს დაცვისა და სოფლის მეურნეობის სამინისტროების ჩართულობით, ქართულ და სომხურ ენაზე ჩატარდება.

რამაზ საყვარელიძე - პროპორციული საარჩევნო სისტემა კიდევ უფრო მარცხიანს გახდის ოპოზიციის მდგომარეობას
ქართული პრესის მიმოხილვა 05.06.2020
თედო ჯაფარიძე - არ მგონია, რომ ამერიკის "დასუსტებით" რუსეთმა ან რომელიმე სხვა ქვეყანამ საკუთარი პოზიციები გაიმაგროს
მითები და რეალობა ჰესების შესახებ
ფინკა ბანკისა და სიმბიოტიკსის თანამშრომლობა მეწარმეების დაკრედიტების მიმართულებით გრძელდება
„ვისოლში“ საწვავზე წლის მიმდინარე პერიოდში რეკორდულად დაბალი ფასები დაფიქსირდა