საქართველოს საგანგებო და სრულუფლებიანმა ელჩმა ირაკლი ასაშვილმა (რეზიდენციით ჯაკარტა) სინგაპურის რესპუბლიკის პრეზიდენტს ჰალიმა იაკობს რწმუნებათა სიგელები გადასცა.
როგორც „ინტერპრესნიუსს“ საგარეო საქმეთა სამინისტროდან აცნობეს, ოფიციალური ცერემონიის დასრულების შემდეგ გაიმართა პრეზიდენტის და საქართველოს ელჩის ორმხრივი შეხვედრა, რომლის ფარგლებშიც მხარეებმა საქართველო-სინგაპურის თანამშრომლობის პერსპექტივები განიხილეს. პრეზიდენტმა ელჩს სინგაპურში წარმატებული მოღვაწეობა უსურვა.
სინგაპურში ვიზიტის ფარგლებში, ირაკლი ასაშვილმა, ასევე, შეხვედრა გამართა სინგაპურის რესპუბლიკის პარლამენტის ვიცე-სპიკერთან ჩარლზ ჩონგთან. შეხვედრის ფარგლებში ორ ქვეყანას შორის პარლამენტთაშორისი ურთიერთობების გაღრმავების საკითხი განიხილეს.