ადიგენის რაიონის სოფლების, ზარზმისა და იჯარეთის მცხოვრებლები მთავრობის ადმინისტრაციასთან აქციას მართავენ და პრემიერ-მინისტრ მამუკა ბახტაძის სახელზე წერილის შეტანას გეგმავენ. მათი მოთხოვნაა, ორივე სოფელს მაღალმთიანის სტატუსი მიენიჭოს.

სოფელ იჯარეთის მცხოვრების, ვახტანგ საგინაძის თქმით, სტატუსის მისაღებად სოფლის მცხოვრებლებმა სახელმწიფო უწყებებს უკვე მიმართეს, თუმცა უშედეგოდ.

„ჩვენს სოფელს აქვს მცირე და მწირი მიწა, საბალახოები არ გაგვაჩნია, პატარ-პატარა სახნავ-სათესი ყანები გვაქვს. 6-7 თვე ზამთარია, არ გვაქვს მაღაზია და სამედიცინო დაწესებულება, საჯარო სკოლა. ჩვენ პირველი განცხადება ინფრასტრუქტურის სამინისტროში შევიტანეთ, თუმცა გვიპასუხეს, რომ სტატუსის მისაღებად სამიდან ერთ კრიტერიუმს უნდა ვაკმაყოფილებდეთ. ზღვის დონიდან 1290 მეტრზე ვართ, ამისათვის სოფლის მოსახლეობამ შევქმენით კომისია, დავიწყეთ სოფლის აღწერა და აღმოჩნდა, რომ 222 მცხოვრები ვართ და აქედან 131 პირი სოფლიდან გასულია, შესაბამისად, მიგრაცია მაღალი გვაქვს და ამ და მწირი მიწების კრიტერიუმებს ვაკმაყოფილებთ”,-აღნიშნა მან.

სოფლების მცხოვრებლების თქმით, იმ შემთხვევაში, თუ მათი მოთხოვნა არ დაკმაყოფილდება, აქცია უფრო მასშტაბურ სახეს მიიღებს.