ქუთაისის ისტორიულ ცენტრში, „მონ პლეზირის“ თაღთან დღეს უფასო კინოჩვენებების კვირეული გაიხსნა. ღია სივრცეში ნებისმიერ მსურველს ფართო ეკრანზე ქართული ფილმებისნახვის საშუალება ეძლევა. პროექტს ქუთაისის მერია აფინანსებს. კინოჩვენებები ქართული კინოს 110 წლის იუბილეს ეძღვნება.

„კინოჩვენებები სიმბოლურად ყოფილ კინოთეატრ "რადიუმის" სიახლოვეს მოეწყობა, სადაც 1912 წელს შედგა პირველი ქართული სრულმეტრაჟიანი დოკუმენტური ფილმის "აკაკი წერეთლის მოგზაურობა რაჭა-ლეჩხუმში" პრემიერა, რომელიც ქუთაისელმა კაცმა ვასილ ამაშუკელმა გადაიღო. ასე რომ, ქართული კინოს ისტორია ნამდვილად ქუთაისიდან იწყება“, - განუცხადა „ინტერპრესნიუსს“ მერიის კულტურის განყოფილების უფროსმა თამთა თურმანიძემ.