დონალდ ტრამპი კიმ ჩენ ინს - მოუთმენლად ველოდები თქვენთან შეხვედრას!

აშშ-ს პრეზიდენტმა დონალდ ტრამპმა ჩრდილოეთ კორეის ლიდერს კიმ ჩენ ინს ომში დაღუპული ამერიკელი ჯარისკაცების ნეშთების დაბრუნებისთვის მადლობა გადაუხადა და აღნიშნა, რომ მოუთმენლად ელოდება მასთან ახალ შეხვედრას.

„მადლობა თავმჯდომარე კიმ ჩენ ინს იმისთვის, რომ მან შეასრულა სიტყვა და ჩვენი საყვარელი და დიდებული უგზო-უკვლოდ დაკარგული ჯარისკაცების ნეშთების სამშობლოში დაბრუნების პროცესი წამოიწყო! არ მიკვირს, რომ თქვენ ასე მოიქეცით. გარდა ამისა, მადლობას გიხდით კარგი წერილისთვის - მოუთმენლად ველოდები უახლოეს დროში თქვენთან მორიგ შეხვედრას!“ - დაწერა ტრამპმა „ტვიტერის“ საკუთარ გვერდზე.

თვითმფრინავი კორეის ნახევარკუნძულზე ომის დროს დაღუპული ამერიკელი ჯარისკაცების ნეშთებით ჰავაის შტატში, აშშ-ს საჰაერო სამხედრო ძალების ბაზაზე გუშინ დაეშვა. ცერემონიაში მონაწილეობა ქვეყნის ვიცე-პრეზიდენტმა მაიკ პენსმა და ინდოეთის-წყნარი ოკეანის სარდლობის მეთაურმა, ადმირალმა ფილიპ დევიდსონმა მიიღეს.