Eastern Promotions და თიბისი სტატუსი ლეგენდარული ბრიტანული ჯგუფის The Chemical Brothers-ის კონცერტს წარმოადგენს

1-ელ სექტემბერს, რუსთავის საერთაშორისო მოტოდორმზე, ქართველი მსმენელის წინაშე 4 გრემის ჯილდოს მფლობელი ბრიტანული დუეტი The Chemical Brothers წარდგება.

როგორც „ინტერპრესნიუსს“ Eastern Promotions-დან აცნობეს, ტომ როულენდსისა და ედ საიმონსისგან შემდგარი ინგლისური დუო ქართველ მსმენელს ტრადიციულად, ვიზუალური ეფექტებისა და თანამედროვე ტექნოლოგიების გამოყენებით, დაუვიწყარ სანახაობას შესთავაზებს.

მათივე ინფორმაციით, ბილეთების გაყიდვა უკვე დაწყებულია tkt.ge-ზე.

„ჯაზ-ფესტივალის მსგავსად, 15 აგვისტოდან სტატუსის მომხმარებლები The Chemical Brothers-ის კონცერტზე დასასწრები ბილეთების შეძენისას ექსკლუზიური ფასდაკლებით ისარგებლებენ.

ინგლისური ელექტრონული მუსიკალური ჯგუფი The Chemical Brothers, რომელიც მსოფლიოში ცნობილია მაღალი ხარისხის საკონცერტო სეტებით, საქართველოში ბოლო მსოფლიო ტურნეს ფარგლებში ჩამოდის. კონცერტზე შესრულდება 1995 წლიდან დღემდე, ჯგუფის მიერ შექმნილი ჰიტები, სხვადასხვა სტუდიური ალბომიდან.

The Chemical Brothers, ელექტრონული საცეკვაო ჟანრის მუსიკის პიონერად არის მიჩნეული. ჯგუფს 1995 წლიდან დღემდე 8 სტუდიური ალბომი აქვს გამოცემული.

ჯგუფის შემოქმედება თითქმის სამ ათწლეულს ითვლის და მათ პოპულარობა ისეთმა ჰიტებმა მოუტანეს, როგორებიცაა - "Block Rockin' Beats", "Hey Boy Hey Girl", "Galvanize", "The Salmon Dance", "Do It Again", "Swoon" და სხვა“, - აღნიშნულია ინფორმაციაში.