ანა ნაცვლიშვილი - პრეზიდენტის მიზანია, რაც შეიძლება ფართო ჩართულობით მოხდეს უზენაესი სასამართლოს კანდიდატის შერჩევა

პრეზიდენტის მიზანია, რაც შეიძლება ფართო ჩართულობით მოხდეს უზენაესი სასამართლოს კანდიდატის შერჩევა და ფართო ჩართულობა გულისხმობს ყველა მნიშვნელოვანი ჯგუფისა და ინსტიტუტის, რაღა თქმა უნდა, პარლამენტის ჩართულობასაც, - ამის შესახებ საქართველოს პრეზიდენტის საპარლამენტო მდივანმა, ანა ნაცვლიშვილმა პრეზიდენტის მიერ უზენაესი სასამართლოს კანდიდატის შერჩევისათვის წამოწყებული პროცესის კომენტირებისას განაცხადა.

„ეს არის ის ინსტიტუტი, რომელიც მნიშვნელოვან გადაწყვეტილებას იღებს და საპარლამენტო ეტაპი ვერ იქნება გამოტოვებული - ამას თავად კონსტიტუცია ამბობს, ამიტომ არანაირად არ არის მოცემულობა ისეთი, რომ პარლამენტი იქნება ამ პროცესიდან გამოთიშული. პირიქით, ეს არის პროცესი, რომელიც პარლამენტს და პრეზიდენტს, რა თქმა უნდა, რთავს, მაგრამ რთავს ამის მიღმა მნიშვნელოვან აქტორებს - საზოგადოებრივ, პროფესიულ ჯგუფებს, ადამიანებს, რომლებსაც აქვთ კვალიფიკაცია და გამოცდილება, რომლებსაც შეუძლიათ ამ პროცესს მისცენ ძალიან ღირებული რჩევები კანდიდატურებთან მიმართებაში. ჩვენ ვიწყებთ აკადემიური წრეებით, მაგრამ პრეზიდენტმა ხაზი გაუსვა, რომ ეს არ იქნება ჩაკეტილი პროცესი - დაიწყება აკადემიური წრეებით და გაგრძელდება და ჩართავს ყველა მნიშვნელოვან აქტორს და ინსტიტუციას, რომლის მონაწილეობაც ამ პროცესის გაჯანსაღებისა და სიძლიერისათვის აუცილებელია“, - აღნიშნა ანა ნაცვლიშვილმა.

შეგახსენებთ, რომ საქართველოს პრეზიდენტი ორშაბათიდან უზენაესი სასამართლოს თავმჯდომარის კანდიდატის შესარჩევად პროფესიულ ჯგუფებთან და საზოგადოებრივ ორგანიზაციებთან კონსულტაციებს იწყებს, რომლებიც მართლმსაჯულების სისტემაში არსებული ვითარების გაუმჯობესებაზე მუშაობენ და პროფესიული კვალიფიკაცია აქვთ.

ნინო გვენეტაძემ უზენაესი სასამართლოს თავმჯდომარის პოსტი 2 აგვისტოს დატოვა.

ვიტალი ბალა - დარწმუნებული ვარ, რომ პუტინთან შეხვედრის შემდეგ ზელენსკი რუსეთის პრეზიდენტთან მიმართებაში ვარდისფერ სათვალეებს მოიხსნის
ქართული პრესის მიმოხილვა 10.12.2019
ბექა ინჯია - მაქსიმუმი უნდა გაკეთდეს იმისთვის, რომ არბიტრაჟისა და მედიაციის ინტიტუტების სტანდარტები საქართველოში მსხვილ ინვესტორთა მოთხოვნებს პასუხობდეს
"ორიონ ჯგუფმა" ვირტუალური ფული შექმნა - სიახლე სამშენებლო სექტორში
პროკრედიტ ბანკსა და არასამთავრობო ორგანიზაცია CENN-ს შორის თანამშრომლობის მემორანდუმი გაფორმდა
ახალი ეტაპი „ემბავუდის“ განვითარებაში