ქართული პრესის მიმოხილვა 06.08.2018

მამუკა არეშიძე - "მოსამართლეების გარკვეული ჯგუფი უდიდეს საფრთხეს წარმოადგენს ქვეყნისთვის"

10-წლიანი აკრძალვა გაუქმებულია, თბილისში ე.წ. აფხაზურნომრიანი მანქანები გამოჩნდნენ

ვის გულისხმობდა გახარია სუბელიანზე უფრო გავლენიან მშობლებში. "საქმე ისეა გაფუჭებული, გამოსავალს ვერ პოულობენ" - ზაზა სარალიძე

* * *

მამუკა არეშიძე - "მოსამართლეების გარკვეული ჯგუფი უდიდეს საფრთხეს წარმოადგენს ქვეყნისთვის"

"სამწუხაროდ, ომიდან 10 წლის თავზეც დეოკუპაციის მიმართულებით პოზიტიურ ცვლილებებზე ლაპარაკი არ შეგვიძლია; მეტიც - სულ უფრო და უფრო მეტად ცდილობს რუსეთი ჩვენი ტერიტორიების მითვისებას. საქართველომ, ფაქტობრივად, ვერც ერთი მნიშვნელოვანი ინიციატივა აფხაზებთან და ოსებთან პირდაპირი ურთიერთობის ასაწყობად კულუარულადაც კი ვერ განახორციელა. იყო და არის ამის მცდელობები, მუშაობს პროგრამები სოციალური მიმართულებით, თუმცა ეს მასშტაბურად ვერაფერს ცვლის. ჩვენ ისიც კი ვერ შევძელით, მომხდარისთვის ფართო პოლიტიკურ-საზოგადოებრივი შეფასება მიგვეცა", - აცხადებს ექსპერტი მამუკა არეშიძე გაზეთ "კვირის პალიტრისთვის" მიცემულ ინტერვიუში, სათაურით "მოსამართლეების გარკვეული ჯგუფი უდიდეს საფრთხეს წარმოადგენს ქვეყნისთვის" / "მოსახლეობის საკმაოდ დიდ ნაწილს იმდენად აღარ სჯერა პოლიტიკოსების, რომ მათთვის სულერთია, ვინ გაიმარჯვებს, საპრეზიდენტო იქნება თუ სხვა ტიპის არჩევნებში".

"ჩვენ უპირველესად უნდა გავაანალიზოთ ჩვენი შეცდომები. არასდროს მითქვამს, ომი საქართველომ დაიწყო-მეთქი. იმიტომ კი არა, რომ ვინმეს ვაფარებ ხელს, არამედ რეალობაა ასეთი, რაც პუტინმაც აღიარა, როდესაც განაცხადა, ამისთვის 2006 წლიდან ვემზადებოდითო. მიხეილ სააკაშვილის შეცდომა ის იყო, რომ დაგებულ ხაფანგში თავი შეგნებულად გაყო. ჩვენში ჯერ კიდევ შემორჩა ხალხი, ვინც ფიქრობს, რომ დეოკუპაცია შესაძლებელია რუსეთთან დიალოგით, რაც წარმოუდგენელია. კი ბატონო, მეც ვფიქრობ, რომ რუსეთთან ლაპარაკი აუცილებელია, ამან შეიძლება ხისტი პროცესები შეარბილოს, დრო მოგვაგებინოს, მაგრამ ნურავის ექნება ილუზია, რომ ამით რამე არსებითად შეიცვლება. უმნიშვნელოვანესია ჩვენი დასავლელი პარტნიორების მკაცრი პოზიცია და მუდმივად შეხსენება რუსეთისთვის, რომ ის ოკუპანტია. ძალიან მნიშვნელოვანია ვაზიანში მრავალეროვანი სწავლებები, მაგრამ საქართველოში მუდმივად ისმის კითხვა _ დაგვეხმარება კი დასავლეთი რეალური ძალით რუსეთის აგრესიის გაგრძელების შემთხვევაში?!", - აღნიშნავს გამოცემის კორესპონდენტთან საუბრისას მამუკა არეშიძე.

"საპრეზიდენტო არჩევნებთან დაკავშირებით "ქართულ ოცნებაში" აზრთა სხვადასხვაობაა. ნაწილი ჯერ კიდევ ფიქრობს, რომ მათ უნდა ჰყავდეთ თავიანთი კანდიდატი. პარტიის ხელმძღვანელობამ ჯერჯერობით ვერ მოახერხა, აეხსნა თავისი გუნდისთვის, რა საჭიროა ამ ტიპის მანევრი. ჩემი აზრით, ამგვარი გადაწყვეტილებით, "ქართული ოცნება" გარკვეულ სივრცეს დატოვებს სხვა პოლიტიკური ძალებისთვის, რათა მათ რეალურად იბრძოლონ ამ პოსტისთვის. გავითვალისწინოთ ისიც, რომ დიდი ალბათობით, შესაძლოა, ჩვენი დასავლელი პარტნიორების პოზიცია იყოს ასეთი, რათა ძალაუფლება ერთი პარტიის ყულაბაში არ მოექცეს. ამასთანავე, არ არის გამორიცხული, ამით `ქართული ოცნება~ შეეცადოს, აჩვენოს, რა ძალას ფლობს ოპოზიცია. ნუ დაგვავიწყდება, რომ ოპოზიციურ კანდიდატთა შორის არის პარლამენტის ექსთავმჯდომარე დავით უსუფაშვილიც, რომელიც, ჩემი აზრით, ხელწამოსაკრავი კანდიდატი სულაც არ არის. ვიცი საზოგადოების ნაწილი, დღევანდელი მოცემულობიდან გამომდინარე, ხმას აუცილებლად დავით უსუფაშვილს მისცემს", - განაგრძობს რესპონდენტი.

"ამომრჩევლის უმრავლესობამ იცის, რაოდენ შეზღუდული უფლებები აქვს პრეზიდენტს. ანუ უნდა აირჩიონ ადამიანი, რომელსაც არ ექნება მნიშვნელოვანი ბერკეტები. შესაბამისად, გაჩნდა გარკვეულწილად აგდებული დამოკიდებულება, რაც არასწორია. პრეზიდენტის პოსტი არის უმნიშვნელოვანესი, მიუხედავად შემცირებული უფლებებისა. მას აქვს მედიატორის უმნიშვნელოვანესი ფუნქცია და შეუძლია, დიდი როლი ითამაშოს პოლიტიკური დაპირისპირებების დროს. საგარეო პოლიტიკის თვალსაზრისითაც აქვს მნიშვნელოვანი სვლების გაკეთების საშუალება. პოლიტიკური ელიტის ბრალია, რომ საზოგადოებამ ზუსტად არ იცის, რა უფლება-მოვალეობები აქვს პრეზიდენტს. გარდა ამისა, მას აქვს უმნიშვნელოვანესი - მთავარსარდლის ფუნქცია საომარ ვითარებაში. ეს ცოტა გაუგებარი მისიაა მშვიდობიანობის დროს უკიდურესად შეზღუდული უფლებების გათვალისწინებით, მაგრამ ფაქტია, რომ აქვს", ამბობს ექსპერტი და შეკითხვაზე - "ენ-დი-აის" კვლევის თანახმად, გამოკითხულთა 62% ფიქრობს, რომ საპრეზიდენტო არჩევნებზე ოპოზიცია ერთი კანდიდატით უნდა წარდგეს..." პასუხობს:

"ენდიაის" კვლევები შეიძლება ვიღაცას აეჭვებდეს, მაგრამ ის ტენდენციას მაინც აჩვენებს, ტენდენცია კი ქვეყანაში ასეთია: ამომრჩევლის ნიჰილისტური განწყობა სულ უფრო და უფრო იზრდება. მოსახლეობის საკმაოდ დიდ ნაწილს იმდენად აღარ სჯერა პოლიტიკოსების, მათთვის სულერთია, ვინ გაიმარჯვებს, საპრეზიდენტო იქნება თუ სხვა ტიპის არჩევნებში, რადგან არსებითად მათთვის არაფერი იცვლება... ოპოზიცია რომ შეთანხმებას თითქმის ვერასდროს ახერხებს, რამდენიმე ფაქტორი განსაზღვრავს. მათში უპირატესი, ალბათ, ამბიციაა. ამასთანავე, აღსანიშნავია ისიც, რომ როდესაც ისინი გაერთიანებას ინდომებენ, მოწინააღმდეგე მხარე - ამ შემთხვევაში "ქართული ოცნება", ცდილობს, ეს გაერთიანება არ დაუშვას, რათა მოწინააღმდეგე არ გაძლიერდეს. ასეთი რამ პოლიტიკაში ყოველთვის და ყველგან ხდება. იმისთვის, რომ ძალაუფლება შეინარჩუნონ, გარკვეულ ნაბიჯებს დგამენ... ეს დასაშვებია, თუ ნაბიჯები რადიკალური და სისხლიანი არ არის. სხვა მხრივ, კულუარებში ბრძოლა პოლიტიკაში მოსულა".

"... ბიძინა ივანიშვილმა "ენ-დი-აის" რეიტინგების ეს კლება დაინახა, მიხვდა, რომ პარტია "ქართულ ოცნებაში" ვითარება კატასტროფულია - ეკონომიკური განვითარება შეჩერებულია, ხელისუფლებასა და საზოგადოებას შორის ურთიერთობა კი - მორღვეული. "ქართული ოცნების" ვეტერანები, რომელთაც ლომის წილი შეიტანეს 2012 წელს პარტიის გამარჯვებაში, ან სრულად ჩამოაშორეს პარტიას, ან ხელოვნურად გარიყეს. სწორედ ამას მოჰყვა ეს ყველაფერი. დაცემულ რეიტინგს პლუსი ის აქვს, რომ ასე მაინც ნათლად ხედავენ, რამდენად დიდია პრობლემები და ამიტომაც დააანონსეს ცვლილებები. პრემიერის პირველი ნაბიჯები და ინიციატივები სწორედ ამ ცვლილებებზეა ორიენტირებული", - ამბობს არეშიძე.

"რამდენიმე ექსპერტთან ერთად მომეცა საშუალება, შევხვედროდი მამუკა ბახტაძეს. უნდა გითხრათ, რომ საინტერესო ხედვები აქვს. თუნდაც უსაფრთხოების მიმართულებით კარგად იცნობს ვითარებას, რაც ჩემთვის ნამდვილად მოულოდნელი იყო. შესაბამისად, ამ მიმართულებით აქვს ძალიან საინტერესო ინიციატივები, ეს ყველაფერი კი მაძლევს იმედს, რომ არა მხოლოდ ამ, არამედ სხვა მიმართულებებითაც ბახტაძე რეალურ ცვლილებებს გაატარებს. საქართველოს დღევანდელი პრემიერი აცნობიერებს იმ მძიმე ვითარებას, რაც ქვეყანაშია როგორც ეკონომიკური, ისე სოციალური მიმართულებით, კარგად ესმის ის მძიმე შედეგები, რაც მოიტანა ხელისუფლებასა და საზოგადოებას შორის დარღვეულმა კომუნიკაციამ. აქედან გამომდინარე, ვფიქრობ, რომ უფრო ეფექტიანი ნაბიჯები გადაიდგმება. ძალიან არ მინდა, იმედი გამიცრუვდეს, ეს არც საზოგადოებას სურს. სხვა შემთხვევაში 2020 წლის საპარლამენტო არჩევნებისთვის "ქართულ ოცნებას" დიდი პრობლემები შეექმნება", - დაასკვნის რესპონდენტი.

"კონკრეტულად რა გახდა ქალბატონ ნინოს გვენეტაძის წასვლის მიზეზი, არ ვიცი, ამიტომ მკითხაობას ვერ დავიწყებ, თუმცა ეს ყველაფერი ძალიან საეჭვო რომ არის, ცხადია. ნინო გვენეტაძემ ჯერ კიდევ თანამდებობაზე ყოფნისას, ფაქტობრივად, აშკარად თქვა, რომ იყო გარკვეული ზეწოლის ქვეშ, თუმცა ამაზე არც საზოგადოებას და არც შესაბამის სტრუქტურებს რეაქცია არ ჰქონიათ. სამწუხაროდ, "ქართული ოცნების" ხელისუფლებამ ძალიან მნიშვნელოვანი ბერკეტი გაუშვა ხელიდან, რომლის საშუალებითაც შეიძლებოდა სასამართლოს რეალური რეფორმა. შესაძლებელი იყო, სხვა პრინციპით დაეწყოთ ცვლილებების განხორციელება და შედეგიც შესაბამისი მიეღოთ. ვფიქრობ, იმის დაშვება, რაც მოხდა, არ შეიძლებოდა - მოსამართლეებმა, რომელთაც დანაშაული ჰქონდათ ჩადენილი საზოგადოების, ხალხის და კონკრეტული ადამიანების წინაშე; რომლებიც უსამართლოდ სჯიდნენ ჩვენს მოქალაქეებს და სააკაშვილის ხელისუფლების საყრდენს წარმოადგენდნენ, შეინარჩუნეს მანტიები. მეტიც - მოსამართლეების გარკვეულმა ჯგუფმა ხელში ჩაიგდო მართვის სადავეები და დღეს უდიდეს პრობლემას და საფრთხეს წარმოადგენენ ქვეყნისთვის, იმაზე დიდსაც კი, ვიდრე სააკაშვილის ხელისუფლების დროს. ამის დაშვება როგორ შეიძლებოდა!.. ესენი არიან აბსოლუტურად თავზე ხელაღებული ადამიანები, რომლებიც თავის გადასარჩენად ყველაფერზე წავლენ. მათ შექმნეს კლანი, რომლის მძევლადაც იქცა სასამართლო სისტემა", - განმარტავს ექსპერტი.

"ნინო გვენეტაძემ შეიძლება შეცდომები დაუშვა და სასამართლოში არსებული ურთულესი ვითარების შეცვლა ვერ შეძლო, მაგრამ ამას გვენეტაძე მარტო, ხელისუფლების მხარდაჭერის გარეშე, ვერ გააკეთებდა. ის დაკორტნეს, შეჭამეს ამ წლების განმავლობაში, ურთულეს ვითარებაში ჩააგდეს... სასამართლოს გაჯანსაღების პროცესი ჩაიშალა. ამაზე პასუხისმგებლობა სრულად "ქართულ ოცნებაზეა". ძალიან ბევრი რამაა გაფუჭებული და ამის გამოსწორება ძალიან რთულია. ფაქტობრივად, მოახერხეს, რომ ამის შეცვლა იმ შემთხვევაში იქნება შესაძლებელი, თუ გარკვეული დემოკრატიული პრინციპები დაირღვევა... რაც შეეხება მარიხუანას მოხმარების თაობაზე მიღებულ გადაწყვეტილებას - ჩემი აზრით, საკონსტიტუციო სასამართლომ მიიღო აბსოლუტურად არასწორი და გაუთვლელი გადაწყვეტილება. მათ შეეძლოთ, სხვაგვარი გადაწყვეტილება მიეღოთ, თუმცა, მგონია, რომ ეს გარკვეული ძალების მიერ ინსპირირებული პროცესია. ვიღაცას სწორედ ამგვარი აჟიოტაჟის შექმნა სურდა. ეს არ არის ლეგალიზაციის კლასიკური მაგალითი, შესაბამისად, პარლამენტი, ვფიქრობ, ამ გადაწყვეტილებას სწორი მიმართულებით დააბალანსებს... მიმაჩნია, რომ ის, რასაც `გირჩი~ სამხედრო სამსახურიდან ახალგაზრდების თავის არიდების თვალსაზრისით აკეთებს, არის ქვეყნის თავდაცვისუნარიანობის შესუსტება, ქართველი ახალგაზრდების დეგრადაციისთვის ხელის შეწყობა და ანტისახელმწიფოებრივი ქმედება - მიუხედავად იმისა, რომ დარწმუნებული ვარ, ფულს რუსეთისა და ზოგიერთი ჩვენი მეზობლისგან არ იღებენ, ფაქტია, რომ მათ საქმეს აკეთებენ; აშკარაა, ქართველი საზოგადოების გასახლეჩად ვიღაცის დაკვეთას ასრულებენ", - დასძენს მამუკა არეშიძე.

10-წლიანი აკრძალვა გაუქმებულია, თბილისში ე.წ. აფხაზურნომრიანი მანქანები გამოჩნდნენ

"საქართველოს ხელისუფლების კონტროლირებად ტერიტორიაზე პერიოდულად ჩნდება ავტომობილები ე.წ. აფხაზური ნომრებით. აღნიშნული ავტომობილები, ზოგ შემთხვევაში, სატვირთო მანქანაა, ზოგ შემთხვევაში კი - მსუბუქი ავტომობილი. რამდენიმე დღის წინ ასეთი მანქანები თბილისსა და სამეგრელოში, სოფელ განმუხურში შენიშნეს. მსგავსი ფაქტების ამსახველი ფოტომასალა ხშირად ჩნდება სოციალურ ქსელ "ფეისბუკში". თანასწორობისა და შერიგების საკითხებში ყოფილი სახელმწიფო მინისტრი პაატა ზაქარეიშვილი აცხადებს, რომ ასეთი მანქანების გადაადგილება სახართველოს ხელისუფლების კონტროლირებად ტერიტორიაზე 2008 წლის ომის შემდეგ აკრძალული იყო და, როგორც ჩანს, ეს აკრძალვა ახლა გაუქმებულია", - წერს გაზეთი "რეზონანსი" სტატიაში სათაურით 10-წლიანი აკრძალვა გაუქმებულია, თბილისში ე.წ. აფხაზურნომრიანი მანქანები გამოჩნდნენ.

"ზაქარეიშვილის ინფორმაციით, ამ მანქანებით აფხაზეთის რიგითი მცხოვრებლები გადაადგილდებიან და ეს მისასალმებელი ფაქტია - "ძალიან კარგი ფაქტია და მივესალმები ამას. ყოველთვის მიმაჩნდა, რომ ეს ყველაფერი საჭირო იყო. "ნაციონალური მოძრაობის" დროს უფრო გადმოდიოდნენ ეს მანქანები და შემდეგ შეწყდა", - აღნიშნა ზაქარეიშვილმა. მისი განცხადებით, 2008 წლის აგვისტოს ომი შემდეგ მათ გადაადგილება აეკრძალათ, რაც ამჟამინდელი ხელისუფლების დროსაც გრძელდება, რაც, ზაქარეიშვილის შეფასებით, უგუნური ქმედება იყო. "2008 წლის აგვისტოს მოვლენების შემდეგ "ნაციონალურმა მოძრაობამ" აკრძალა მათი მოძრაობა, რაც გაგრძელდა "ქართული ოცნების" დროსაც. მე არაერთხელ დავრეკე, როდესაც ვიყავი სახელმწიფო მოხელე, რომ ეს იყო უგნურება და შეზღუდვები არ უნდა ყოფილიყო. ისინი მაქსიმალურად უნდა მოძრაობდნენ", - აცხადებს ის. ზაქარეიშვილის თქმით, აუცილებელი ფაქტია, აფხაზებმა და ოსებმა იმოძრაონ საქართველოს დანარჩენ ტერიტორიაზე იმისთვის, რომ უკეთ შეიცნონ საქართველო, რაც ჩვენ ტრაგიკულ ამბად არ უნდა მივიჩნიოთ.

"ეს არის უბრალოდ ნომერი, რომლის იდენტიფიცირებაც ხდება. ნელ-ნელა დაიწყო ამ მანქანებმა მოძრაობა და მიმაჩნია, რომ ეს ძალიან კარგი ფაქტია. მგონია, რომ რაც შეიძლება მეტმა აფხაზმა და ოსმა უნდა იმოძრაოს მანქანებით თუ უმანქანოდ დანარჩენი საქართველოს ტერიტორიაზე და ნახონ, როგორია და რა არის საქართველო; ივაჭრონ აქ, წაიღონ ნავაჭრი თავიანთ ქალაქებში, სოფლებში და უფრო მიეჩვიონ საქართველოს. ამაში არანაირი ტრაგედია არ არის და ნუ ვეძებთ იმას, რაც არ არსებობს", - აღნიშნა ზაქარეიშვილმა. მისი განცხადებით, ეს ნომრები ავტომობილის იდენტიფიცირებისთვის საჭირო ატრიბუტია, ისევე, როგორც აფხაზებისა და ოსების პასპორტები - პიროვნების იდენტიფიცირების საშუალება, რაც ჩვეულებრივ ფაქტად უნდა აღვიქვათ", - განაგრძობს გამოცემა.

"საკმარისია, ფული გადაიხადო, რომ მანქანას რასაც გინდა, იმას დაადებ; თუ გინდა, "მე შენ მიყვარხარ"-ს დააწერ ნომერზე და ეს პრობლემა არ არის. ასეთ რაღაცებს უნდა ვუყუროთ მშვიდად. ეს არ არის პოლიტიკა, ეს არის ნივთის ნომერი. ჩვენ აფხაზებსა და ოსებს მათი პასპორტებით ვმკურნალობთ და ეს მიგვაჩნია ნორმალურ მოვლენად. თუკი პიროვნების ხელთ არსებული დოკუმენტით, რომელიც მის იდენტიფიცირებას ახდენს, ვმკურნალობთ, რა პრობლემაა, რომ ნივთის დასახელება იყოს მისაღები?!", - ამბობს პაატა ზაქარეიშვილი, რომლის თქმით, "ამიტომ არც უნდა გაუგოს იმ ადამიანებს, ვინც ამის მოწინააღმდეგეა", - დასძენს გამოცემა.

ვის გულისხმობდა გახარია სუბელიანზე უფრო გავლენიან მშობლებში... "საქმე ისეა გაფუჭებული, გამოსავალს ვერ პოულობენ" - ზაზა სარალიძე

პარლამენტში შექმნილმა დროებითმა საგამოძიებო კომისიამ შს მინისტრი გიორგი გახარია, ყოფილი მთავარი პროკურორი ირაკლი შოთაძე და იუსტიციის მინისტრი თეა წულუკიანი გამოჰკითხა. გახარიამ რამდენჯერმე თავადაც მიმართა კომისიის წევრებს, მისი ერთ-ერთი შეკითხვა ასე ჟღერდა: "მე რომ არაკონსტრუქციულად ვიყო განწყობილი, ახლა გკითხავდით, თქვენ რა ახალი ფაქტორები გამოავლინეთ? ორთვენახევარია კომისია მუშაობს, რა გამოავლინეთ?~ კომისიის მიმართ ასეთი დამოკიდებულება საპარლამენტო უმრავლესობიდან მხოლოდ დიმიტრი ცქიტიშვილმა­ მიიღო შეურაცხყოფად და გახარიას კომისიის კრიტიკისგან თავის შეკავება ურჩია. ფაქტია, ჯერ კიდევ დაუდგენელია, ვინ მოკლა დავით სარალიძე. სწორედ ამ მთავარ შეკითხვას სვამს "კვირის პალიტრასთან" დავით სარალიძის მამა ზაზა სარალიძეც", - წერს გაზეთი "კვირის პალიტრა" სტატიაში სათაურით ვის გულისხმობდა გახარია სუბელიანზე გავლენიან მშობლებში / "პოლიტიკური დისკუსიები რომ გამართეს კომისიის სხდომაზე, ვინმეს შეუძლია პასუხი გამცეს, ვინ მოკლა ჩემი შვილი?"

"პროკურორ ფხაკაძესაც ჩემთვის ბევრჯერ უთქვამს, გ.ჯ.-ს ბიძები, ვინმე ნაკაიძეები, რომლებიც ძალიან მდიდრები არიან, მათი დისშვილის უდანაშაულოდ გამოცხადებასა და ციხიდან გამოყვანას ცდილობენო. გ.ჯ.-ს მშობლებიც გავლენიანი ბიზნესმენები არიან და შესაძლოა შს მინისტრი ბევრად გავლენიან სხვა მშობლებში მათ გულისხმობდა. ფაქტია, გ.ჯ.-ს მხარემ ეს ნაწილობრივ მოახერხა, რადგან ის მხოლოდ მკვლელობის მცდელობაზეა დაკავებული, დათოს რეალური მკვლელი კი ბუნებაში ჯერ კიდევ არ არსებობს. სხვათა­ შორის, სწორედ ამის ეშინოდა ფხაკაძესაც - საქმე თავზე არ დამხობოდა, მაგრამ ვუმტკიცებდი, რომ ეს გარდაუვალი იყო და არა იმიტომ, რომ გ.ჯ.-ს გავლენიანი ბიძები ჰყავს. ფხაკაძემ გამოძიება თავიდანვე არასწორად წარმართა. კომისიის სხდომაზეც გახარია და შოთაძე იმას კი არ ამბობდნენ, რომ შეცდომა დაუშვეს, ან რაღაც ეტაპზე შედეგი ვერ გათვალეს და ხარვეზებს ახლა გამოასწორებენ, ისევ დამნაშავე და გამყალბებელი თანამშრომლების დაცვას ცდილობდნენ. ისევ უნდათ დაამტკიცონ, რომ მხოლოდ გ.ჯ. და გ.ბ. ურტყამდნენ ჩემს შვილს დანას. ვერავინ დამაჯერებს, რომ ჩემი შვილი გ.ბ.-მ მოკლა. არ დავუშვებ, რომ ის გამოაცხადონ დათოს მკვლელად, რეალურმა მკვლელმა კი ქუჩაში ინავარდოს", - აცხადებს გამოცემის კორესპონდენტთან საუბრისას ზაზა სარალიძე.

"შოთაძემ გაბედა და ჩემი შვილის სული შეაწუხა - შინაგანი რწმენა მაქვს, დათო სარალიძეს გ.ბ. მოკლავდაო. ისიც განაცხადა, რომ მისი რწმენით, გ.ბ. დანას დათოს წინააღმდეგ მისი გაბარიტებიდან გამომდინარე გამოიყენებდა. ანუ, მისი ნათქვამიდან ერთი აზრი გამომაქვს - გ.ბ.-ს დანა აუცილებლად უნდა ეხმარა, რადგან დათოს ვერ ერეოდაო. პროკურატურის ეს ვერსია სასამართლომაც აბსურდად ჩათვალა. საერთოდ, ფხაკაძე თავდაპირველად მიმტკიცებდა, მხოლოდ გ.ჯ.-მ მიაყენა დათოს 12 ჭრილობაო და როდესაც მიხვდა, ასეთ უაზრობას ვერ დამაჯერებდა, საქმეში გ.ბ. შემოიყვანა. ამ საქმის გამოძიება შეუძლებელია. პოლიტიკური დისკუსიები რომ გამართეს კომისიის სხდომაზე, ვინმეს შეუძლია პასუხი გამცეს, ვინ მოკლა ჩემი შვილი? როდესაც ქუჩაში გამოვედი და ხალხს თანადგომა­ ვთხოვე, თეა წულუკიანმა შემომითვალა, ეს საქმე ქუჩაში გასარჩევი არ არისო. ახლა ხომ სხედან კაბინეტებში და არჩევენ ჩემი შვილის მკვლელობის საქმეს, იქნებ პარლამენტმა ან შსს-მ გამცეს პასუხი, ვინ მომიკლა დათო? იმედიც აღარ დამრჩა, რომ ოდესმე ამ კითხვაზე მიპასუხებენ", - განაგრძობს დათო სარალიძე.

"კომისიის დასკვნას ინტერესით ველოდები, თუმცა მაინც პროკურატურის გადასაწყვეტია, ვინ უნდა დააკავონ. გახარიამ განაცხადა, შსს-ც კომისიის რეკომენდაციას ელოდებაო. თუ აქვთ ახალი გარემოებები გამოვლენილი, რატომ ელოდებიან შს სამინისტრო და პროკურატურა კომისიის დასკვნას? კომისია და საგამოძიებო სტრუქტურა ხომ სულ სხვადასხვა პასუხისმგებლობის ორგანოებია? ეს კიდევ ერთხელ მიანიშნებს, რამდენად ზერელე დამოკიდებულება აქვს სახელმწიფოს ამ საქმის მიმართ", - აღნიშნავს სარალიძე და შეკითხვაზე - "კომისიამ თავიდანვე გასცა მიხეილ კალანდიას დაკავების რეკომენდაცია. თქვენ რამდენჯერმე შეხვდით შსს-ს წარმომადგენლებს, რას გპასუხობენ, რატომ არ აკავებენ მიხეილ კალანდიას?" - პასუხობს:

"ბოლოს მითხრეს, ახლა რომ დავაკავოთ, შესაძლოა ბრალდება ბოლომდე ვერ გავიტანოთო. თქვენ დაიჭირეთ იმ ფაქტების საფუძველზე, რაც ხელში გაქვთ და თუ სასამართლო გაათავისუფლებს, თქვენს პასუხისმგებლობას ხომ მოიხსნით ჩემი შვილის­ წინაშე და შემდეგ სასამართლოსთან მექნება შეკითხვები-მეთქი. ვერაფერს მეუბნებიან. კალანდიას დაკავება კი არა, ორთვენახევარია პროკურორები თუ გამომძიებლები ამტკიცებენ, მირზა სუბელიანის დაკითხვა ღირებულ ინფორმაციას არ მოგვცემდაო. საუბარია ადამიანზე, რომელიც თავიდან ბოლომდე ჩართული იყო გამოძიებაში და ეს დაადასტურა პროკურორმა შაყულაშვილმაც. სწორედ მას დაურეკა სუბელიანმა, შარში ვარ, როგორ მოვიქცეო და ეს თავიდანვე იცოდა შოთაძემაც. მიუხედავად ამისა, არც სუბელიანი დაუკითხავთ, არც მისი სახლი გაუჩხრეკიათ, არც მისი შვილისა და დეიდაშვილის მობილურები ამოუღიათ და მკვლელობის დღეს სოცქსელში არც მათი მიმოწერით დაინტერესებულან. სამაგიეროდ, თურმე დათოს მკვლელობის პირველივე დღეს მე და ჩემი ცოლი მოსმენაზე აგვიყვანეს. როდესაც ეს შევიტყვე და განმარტება მოვითხოვე, მიპასუხეს, თქვენი მოსმენა აუცილებელი იყო, რომ მოწმეებზე ზეგავლენა არ მოგეხდინათო".

"წარმოგიდგენიათ, რვა თვე როგორ აბსურდში მაცხოვრებენ?! ვერ ვიტყვი, რომ ახლა შსს-ში არაფერს აკეთებენ, მაგრამ საქმე ისეა გაფუჭებული, გამოსავალს ვერ პოულობენ, როგორ მიუდგნენ დამნაშავეებს. მე მოვითხოვ - ყველა ის პირი უნდა მიეცეს პასუხისგებაში, ვინც ეს საქმე გააყალბა. გამომძიებელმა ირაკლი ფიფიამ, პროკურორმა ზვიად ფხაკაძემ და კიდევ სხვებმა ყველაფერი აურ-დაურიეს და მკვლელებს ხელი დააფარეს. სულ ცოტა ხნის წინ ჩემი შვილის მეგობარი დ.ღ. იმ იმედით დაიჭირეს, რომ კონკრეტულ პირებზე მისცემდა ჩვენებას, მაგრამ არაფერი თქვა და მომავალშიც არაფერს იტყვის, სანამ არ გამოიკვეთება იმ მაღალჩინოსნების დანაშაული, რომლებიც სუბელიანისა და კალანდიას დასაცავად მტკიცებულებებს ანადგურებდნენ და მოწმეებზე ზეწოლას ახდენდნენ"- დასძენს ზაზა სარალიძე.