აგვისტოს ომის ათი წლისთავთან დაკავშირებით, ქუთაისში აქცია-პერფორმანსი გაიმართა. არასამთავრობო ორგანიზაცია „ევროპა ჩვენი სახლია“ რუსეთის მიერ საქართველოს ტერიტორიების ოკუპაციასთან ერთად ქუთაისში საინფორმაციო დაფაზე რუსული წარწერების განთავსებას აპროტესტებს.
ორგანიზაციის წევრებმა თეთრი ხიდიდან მერიამდე მსვლელობა მოაწყვეს და რუსული ოკუპაცია გააპროტესტეს. მათ საინფორმაციო დაფებზე რუსული ოკუპაციის საწინააღმდეგო ფლაერები გააკრეს.
„როდესაც ჩვენი ტერიტორიები ოკუპირებულია რუსეთის მიერ, ჩვენს ქალაქში საინფორმაციო დაფებზე წარწერები რუსულ ენაზე არის დატანილი, რაც მიუღებელია. ვაპროტესტებთ ამ ფაქტს და მოვუწოდებთ ადგილობრივ ხელისუფლებას, გაიხსენოს, რომ რუსეთი არის ოკუპანტი და არ უნდა იყოს ამ ქალაქში არც რუსული თეატრი და არც სხვა ღონისძიება, რაც მათთან არის დაკავშირებული“, - განაცხადა ორგანიზაციის დამფუძნებელმა გია გოქაძემ. აქციის მონაწილეებმა ფლაერები ადგილობრივი თვითმმართველობის შენობასთანაც გააკრეს.