ბუნებრივია, ბატონი ბიძინას კანდიდატურა რომ განხილულიყო და მას თანხმობა განეცხადებინა, საბოლოოდ, უალტერნატივო კანდიდატი იქნებოდა, - ამის შესახებ ფრაქცია „ქართული ოცნების” თავმჯდომარემ მამუკა მდინარაძემ საპრეზიდენტო კანდიდატურასთან დაკავშირებით “ინტერპრესნიუსის” კითხვის საპასუხოდ განაცხადა.

მამუკა მდინარაძის შეფასებით, ბიძინა ივანიშვილს საარჩევნო შედეგებთან მიმართებაში კონკურენტი ვერ ეყოლებოდა. ამასთან, დეპუტატის თქმით, ბიძინა ივანიშვილს საკუთარი კანდიდატურის წამოყენება თავად არ სურდა.

„ბუნებრივია, ბატონი ბიძინას კანდიდატურა რომ განხილულიყო და მას თანხმობა განეცხადებინა, საბოლოოდ, უალტერნატივო კანდიდატი იქნებოდა, მითუმეტეს, საარჩევნო შედეგებთან მიმართებაში მას კონკურენტი ვერ ეყოლებოდა, მაგრამ ბატონი ბიძინა ამის შესახებ ნეგატიურ დამოკიდებულებას გამოთქვამდა. არ სურდა, მითუმეტეს იმ ფონზე, რომ ის იყო ერთ-ერთი ავტორი იმ იდეისა, რომ კანდიდატი უნდა იყოს ზეპარტიული. „ქართული ოცნებაც” ამ იდეას მხარს უჭერს და ვინაიდან ჩვენ გვგონია, ვფიქრობთ და ჩემი აზრით, სწორად მიგვაჩნია, რომ ზეპარტიული კანდიდატი არის პრეზიდენტის როლის სწორი აღქმა, რომელიც ჩვენ ახალ კონსტიტუციაში ჩავწერეთ, ხაზგასმით მხარს დავუჭერთ რომელიმე დამოუკიდებელ კანდიდატს. ჯერ ამის შესახებ საბოლოო გადაწყვეტილება არ არის”, - განაცხადა მამუკა მდინარაძემ.