რუსეთის საგარეო უწყება უარყოფს ბერძნული მედიით გავრცელებულ განცხადებას, რომლის თანახმადაც მოსკოვი სალონიკში, სექტემბერში დაგეგმილი საერთაშორისო გამოფენისას არეულობის მოწყობას გეგმავდა.

ბერძნული მედიასაშუალება „კონტრანიუსი“ საბერძნეთის სპეცსამსახურებში სანდო წყაროზე დაყრდნობით იუწყება, რომ ზოგიერთი ბერძნული ქუჩის დაჯგუფება, რომელიც პუტინის შავი სალაროდან ფინანსდება, საერთაშორისო დარგობრივი გამოფენა-ბაზრობისთვის ემზადება.

გამოცემის ინფორმაციით, ღონისძიებას ქვეყნის პრემიერმინისტრი ალექსის ციპრასი, ამერიკის ვიცეპრეზიდენტი მაიკ პენსი და ბალკანური ქვეყნების ლიდერები უნდა დაესწრონ. ამ არეულობის მიზანი იმ შეთანხმების დისკრედიტაცია უნდა გამხდარიყო, რომელიც მაკედონიისთვის სახელის გადარქმევას უკავშირდება.

რუსეთის საგარეო უწყებაში ამ ინფორმაციის საპასუხოდ განაცხადეს, რომ გამოცემის მასალაში არც ერთი სიტყვა სიმართლეს არ შეესაბამება.