„ქართულ ოცნებას“ საპრეზიდენტო არჩევნებთან დაკავშირებით არ აქვს ისეთი პრობლემები, რომ საკუთარი კანდიდატურა დაასახელოს, - ამის შესახებ „ინტერპრესნიუსს“ პოლიტოლოგმა ვახტანგ ძაბირაძემ განუცხადა. მისი აზრით, „ქართული ოცნების“ მხრიდან ბიძინა ივანიშვილის კანდიდატურის დასახელება წარმოუდგენელია.

„ჩემი აზრით, ივანიშვილის კანდიდატურის დასახელება წარმოუდგენელია. ვფიქრობ, ეს არ მოხდება. არ მგონია, „ქართულ ოცნებას“ ახლა საპრეზიდენტო არჩევნებთან დაკავშირებით ისეთი პრობლემები ჰქონდეს, რომ საკუთარი კანდიდატურის დასახელებაზე იფიქროს. ალბათ, „ქართული ოცნება“ დარჩება იმ პოზიციაზე, რა პოზიციაც გაჟღერდა. დასახელდება ალბათ, კიდევ დამოუკიდებელი კანდიდატები. მთლიანობაში, ამ მხრივ არ მგონია „ქართულ ოცნებას“ პრობლემები ჰქონდეს“, - განაცხადა ძაბირაძემ.

მისივე თქმით, სალომე ზურაბიშვილის განცხადებამ აგვისტოს ომთან დაკავშირებით მის მიმართ დამოკიდებულებები კატასტროფულად არ შეუცვლია.

„ზურაბიშვილის შანსი, თუ „ქართული ოცნება“ მხარს არ დაუჭერს, იქნება არც ისე დიდი. თუ ზურაბიშვილს მხარს დაუჭერს, აქვს შანსი გახდეს პრეზიდენტი. საზოგადოებაში ზურაბიშვილის კანდიდატურის დასახელებას შეხვდნენ ძალიან ჩვეულებრივად. ვთვლი თუ დაუჭერს მას მხარს, საკმარისი იქნება გამარჯვებისთვის“, - აღნიშნა ძაბირაძემ.