აჭარის ტურიზმისა და კურორტების დეპარტამენტის მოწვევით, რეგიონს პოლონელი ჟურნალისტები სტუმრობდნენ. როგორც „ინტერპრესნიუსს“ დეპარტამენტიდან აცნობეს, პოლონელი ჟურნალისტები აჭარის ტურისტული პროდუქტების შესახებ სტატიებსა და რეპორტაჟებს ამზადებენ. პრესტურის ფარგლებში ჟურნალისტებმა ბათუმის ტურისტული ღირსშესანიშნაობები, ბათუმის ბოტანიკური ბაღი, გონიო-აფსაროსის ციხე-მუზეუმი და მთიანი აჭარა დაათვალირეს. ისინი ასევე, გაეცნენ ქართულ ფოლკლორსა და ადგილობრივ სამზარეულოს.
აჭარის ტურიზმის დეპარტამენტის ორგანიზებით, წელს რეგიონში სამიზნე ქვეყნებიდან 25-მდე პრეს და ინფოტური განხორციელდა, რომელთა ფარგლებშიც აჭარის ტურისტულ პოტენციალს წამყვანი მედიასაშუალებებისა და ტურისტული სააგენტოების წარმომადგენლები გაეცნენ.
„პოლონეთი აჭარისთვის ერთ-ერთი სამიზნე ქვეყანაა, სადაც რეგიონის პოპულარიზაცია გარე რეკლამის, ონლაინ რეკლამისა და სხვა სარეკლამო არხების გზით მიმდინარეობს. 2018 წლის 6 თვის მონაცემებით, პოლონეთიდან აჭარაში მოგზაურების ვიზიტები 25%- ით გაზრდილია“, - ნათქვამია ინფორმაციაში.