ხულოსა და შუახევში ვეტერანებს „აქტიური რეზერვის საპილოტე პროგრამა'' გააცნეს

ხულოსა და შუახევში ვეტერანებს „აქტიური რეზერვის საპილოტე პროგრამა“ გააცნეს. როგორც „ინტერპრესნიუსს“ სსიპ „ვეტერანების საქმეთა სახელმწიფო სამსახურიდან“ აცნობეს, მათი სამსახურის აჭარის ა/რ სამმართველოს უფროსი შოთა ყიფიანი, ეროვნული გვარდიის მე-10 კადრირებული ბრიგადის მაიორი ფრიდონ მახარაძე და „ვეტერანების საქმეთა სახელმწიფო სამსახურის“ აჭარის ა/რ სამმართველოს წარმომადგენლები იმყოფებოდნენ ხულოსა და შუახევში, სადაც ადგილობრივ ვეტერანებს შეხვდნენ. მათ საქართველოს თავდაცვის სამინისტროს მიერ გამოცხადებული „აქტიური რეზერვის საპილოტე პროგრამის'' შესახებ ისაუბრეს და ყურადღება გაამახვილეს ვეტერანების ჩართულობის მნიშვნელობაზე ამ პროექტში.

შუახევისა და ხულოს ვეტერანების საქმეთა სახელმწიფო სამსახურის წარმომადგენლებს, სსიპ „ვეტერანების საქმეთა სახელმწიფო სამსახურის“ აჭარის ა.რ სამმართველოს უფროსმა შოთა ყიფიანმა, საინფორმაციო დაფები გადასცა.

ვეტერანების საქმეთა სახელმწიფო სამსახურის ინფორმაციით, საპილოტე პროგრამაში მონაწილეობა შეუძლიათ აღნიშნულ რეგიონებში მცხოვრებ 18-დან 22 წლის ჩათვლით სტუდენტებსაც, რომლებსაც სარეზერვო სამსახურის ერთი კონტრაქტის ვადის დასრულების შემდეგ, სავალდებულო სამსახური მოხდილად ჩაეთვლებათ. ჩარიცხვის შემთხვევაში, რეზერვისტს სამუშაო ადგილი შეუნარჩუნდება და სამსახურის პერიოდი შრომის საერთო სტაჟში ჩაეთვლება. რეზერვში ჩარიცხულ მოქალაქეებს 5 - წლიანი კონტრაქტი გაუფორმდებათ და მათი შრომის ანაზღაურება ყოველთვიურად წოდებრივი სარგოს 20% -ს შეადგენს. სამხედრო სარეზერვო სამსახურის გავლის პერიოდში კი რეზერვისტები შრომის ანაზღაურების სრულ ოდენობას მიიღებენ. საერთო ჯამში, რიგითი რეზერვისტის საშუალო ანაზღაურება, წლიურად ხელზე ასაღები 2760 ლარია. საბრძოლო მომზადება წლის განმავლობაში 45 დღეზეა გათვლილი, რომელიც 12 თვეზე ნაწილდება.

„საბუთები მიიღება 1-ელი აგვისტოდან 7 სექტემბრის ჩათვლით, ყოველ სამუშაო დღეს, დილის 10-დან საღამოს 4 საათამდე - ქ. ბათუმი, ადლიის ქუჩა N76, ეროვნული გვარდიის მე-10 კადრირებულ ბრიგადაში; ქ. თელავი - თამარ მეფის ქუჩა N36, ეროვნული გვარდიის მე-20 კადრირებულ ბრიგადაში; სპეციალისტთა რეზერვისათვის, თავდაცვის სამინისტრო, კვინიტაძის 20. განცხადების ჩაბარებისას მოქალაქემ თან უნდა იქონიოს: 1. პირადობის მოწმობა; 2. ფოტოსურათი 3X4 – 1 ცალი; 3. ჯანმრთელობის ცნობა; 4. სამხედრო ბილეთის ან მიწერის მოწმობის ასლი; საკონტაქტო ინფორმაცია: (+995 032) 2 75 26 44; მობ: 595 06 03 44; (+995 032) 291 04 21“, - ნათქვამია ინფორმაციაში.