სამტრედია–ლანჩხუთი–გრიგოლეთის გზის მე-9 კმ-ზე 21 და 22 აგვისტოს მოძრაობა შეიზღუდება, - ამის შესახებ „ინტერპრესნიუსს“ საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის პრესსამსახურიდან აცნობეს.
მათივე, ინფორმაციით, 2018 წლის 21 აგვისტოს, 10:00 საათიდან 22 აგვისტოს 22:00 საათამდე, სს „საქართველოს რკინიგზა” საერთაშორისო მნიშვნელობის სამტრედია–ლანჩხუთი–გრიგოლეთის საავტომობილო გზის მე-9 კმ-ზე (საჯავახო) არსებული დაცული სარკინიგზო გადასასვლელის ორივე მხარეს, საავტომობილო გზის ჰორიზონტალური მოედნის მოწყობას (ასფალტ-ბეტონის საფარის მოწყობა) გეგმავს.
„აღნიშნული სამუშაოების განსახორციელებლად, საჭიროა გზის სავალი ნაწილის დროებითი ჩაკეტვა და ავტოტრანსპორტის მოძრაობის გადართვა გრუნტის გზაზე.
სამუშაოების წარმოების პერიოდში, საავტომობილო გზაზე გამოყოფილი იქნება სათანადოდ აღჭურვილი გამწევი ავტოსატრანსპორტო საშუალება, ასევე სს „საქართველოს რკინიგზის” შესაბამისი თანამშრომლები (სიგნალისტები), უზრუნველყოფენ საავტომობილო ტრანსპორტის ნაკადის რეგულირებას”, - ნათქვამია ინფორმაციაში.
საავტომობილო გზების დეპარტამენტის ცნობით, მოძრაობა განხორციელდება საპატრულო პოლიციის უშუალო ზედამხედველობით და კოორდინაციით.