გერმანიის კანცლერის ვიზიტი მაქსიმალურად უნდა გამოვიყენოთ იმისთვის, რომ არსებული პრობლემები დავძლიოთ,- ამის შესახებ „ევროპული საქართველოს" წევრმა გიორგი ტუღუშმა ჟურნალისტებს განუცხადა.
მისივე თქმით, ის, რომ საქართველოს საკითხი მაღალი დონის შეხვედრებზე დღის წესრიგის თემა აღარ არის, ეს უდიდესი პრობლემაა.
„ეს არ არის ახალი, რომ საქართველო მაღალი დონის შეხვედრებზე აღარ არის დღის წესრიგის ნაწილი. რაც შეეხება პუტინის და მერკელის შეხვედრას, ჩვენ არაერთხელ გავხდით მოწმე, რომ უკრაინა იყო ნახსენები არაერთი მაღალი დონის შეხვედრაზე და საქართველოთი არა თუ დაინტერესება, ხსენებაც არ ყოფილა. ჩვენ მუდმივად მივუთითებთ, რომ ეს არის ერთ-ერთი დიდი პრობლემა.
რაც შეეხება გერმანიის კანცლერის ვიზიტს, ეს არის ძალიან მნიშვნელოვანი, რადგან გერმანია არის არა მარტო საქართველოს პარტნიორი, არამედ გადამწყვეტი ქვეყანაა, როცა საკითხი ნატო-ში გაწევრიანებას ეხება. ამიტომ, ეს ვიზიტი მაქსიმალურად უნდა იყოს გამოყენებული იმისთვის, რომ ის პრობლემები, რაც არსებობს, დავძლიოთ",- განაცხადა ტუღუშმა.