საქართველოს პრემიერ-მინისტრი მამუკა ბახტაძე სუს-ის უფროსის მოადგილის, იოსებ გოგაშვილის გადადგომის საკითხზე გაკეთებულ განცხადებებს პოლიტიკურ აჟიოტაჟს უწოდებს. ასე უპასუხა ბახტაძემ ჟურნლისტების შეკითხვებს, თუ რამდენად შეესაბამება გავრცელებული ინფორმაცია სიმართლეს, რომ გოგაშვილი თანამდებობიდან თანხების მითვისებისა და პანკისში ჩატარებული სპეცოპერაციის გამო გაუშვეს.
"ამ საკითხთან დაკავშირებით თვითონ უწყება გააკეთებს კომენტარს. რაც შეეხება სხვა მოსაზრებებს, ვფიქრობ ეს არის უბრალოდ პოლიტიკური აჟიოტაჟი",- განაცხადა ბახტაძემ.
სახელმწიფო უსაფრთხოების სამსახურის უფროსის მოადგილე იოსებ გოგაშვილმა თანამდებობა დატოვა. ინფორმაცია „ინტერპრესნიუსს“ სუს-ში დაუდასტურეს. უწყებაში გოგაშვილის გადადგომის დეტალებზე არ საუბრობენ.
იოსებ გოგაშვილი ვახტანგ გომელაურის მოადგილედ 2015 წლის აგვისტოში დაინიშნა.