დავით ზალკალიანი - ანგელა მერკელის ვიზიტი საქართველოს ხელისუფლების მიერ განხორციელებული რეფორმების და საგარეო პოლიტიკური კურსის მხარდაჭერაა

ევროკავშირის ერთ-ერთი წამყვანი ქვეყნის კანცლერის ვიზიტი საქართველოში ძალიან მნიშვნელოვანია, - ამის შესახებ საქართველოს საგარეო საქმეთა მინისტრმა დავით ზალკალიანმა ჟურნალისტებს გერმანიის კანცლერის ანგელა მერკელის ვიზიტის შეფასებისას განუცხადა. მისი თქმით, დღევანდელი რეალობიდან და გამოწვევებიდან გამომდინარე, მისი ვიზიტი მნიშვნელოვანი გზავნილია.

„ეს ვიზიტი არის მხარდაჭერა საქართველოს ხელისუფლების მიერ განხორციელებული რეფორმების, ასევე იმ საგარეო პოლიტიკური კურსის, რომელსაც საქართველოს ხელისუფლება ატარებს - საქართველოს ევროატლანტიკური ინტეგრაციის, საქართველოს სამშვიდობო პოლიტიკის.

მნიშვნელოვანია, რომ ვიზიტის დროს, განსაკუთრებული ყურადღება დაეთმობა ეკონომიკურ განზომილებას. აუცილებელია, რომ ჩვენი ეკონომიკური თანამშრომლობის დონე იყოს შესაბამისობაში საგარეო და თავდაცვის სფეროში თანამშრომლობის პროცესებთან. გარდა ამისა, მნიშვნელოვანია, რომ ეს ვიზიტი არის რეგიონალური ხასიათის. რეგიონში მნიშვნელოვანი ინფრასტრუქტურული პროექტები ხორციელდება და ამ თვალსაზრისითაც საქართველოს განსაკუთრებული ადგილი უკავია. ეს ვიზიტი კიდევ ერთხელ იქნება ხაზგასმა იმისა, რომ საქართველოს მნიშვნელოვანი ადგილი აქვს დათმობილი გერმანიის პოლიტიკურ დღის წესრიგში",- განაცხადა ზალკალიანმა.

გერმანიის კანცლერი ანგელა მერკელი საქართველოს 23-24 აგვისტოს ეწვევა.