25 აგვისტოს ბორჯომში ტრადიციული სახალხო დღესასწაული „ბორჯომობა 2018“ აღინიშნება. როგორც „ინტერპრესნიუსს“ ბორჯომის მუნიციპალიტეტიდან აცნობეს, სამზადისი ყოველდღიურ რეჟიმში აქტიურად მიმდინარეობს. მათივე ინფორმაციით, წლევანდელი „ბორჯომობა" გამორჩეული და დასამახსოვრებელი იქნება, რადგან წელს ბორჯომს ქალაქის სტატუსის მინიჭებიდან 100 წელი შეუსრულდა.

ბორჯომის მერის ლევან ლიპარტიას თქმით, სადღესასწაულო პროგრამაც სწორედ ამ საიუბილეო თარიღს მიეძღვნება.

„პროგრამა მრავალფეროვანია და დატვირთულია კულტურული, სპორტული და გასართობი ღონისძიებებით. 12:00 საათიდან მერაბ კოსტავას სახელობის ბაღში ვიწვევთ ყველა მსურველს სპორტულ შეჯიბრებებში მონაწილეობისთვის. 14:00 საათიდან კი სანახაობრივი წარმოდგენები ცენტრალურ პარკში და მის მიმდებარე ტერიტორიაზე გადაინაცვლებს. ადგილობრივებსა და ჩვენი ქალაქის სტუმრებს ელით ეთნოგრაფიული კუთხეები, ხელოვანების ნამუშევრების გამოფენა-გაყიდვა, კოსტუმირებული წარმოდგენები, ექსპერიმენტორიუმის შოუ, გასართობები ბავშვებისათვის, ასევე ფოლკლორული კონცერტი, კლასიკური მუსიკის კონცერტი და ბოლოს გალა კონცერტი ცნობილი მომღერლებისა და ანსამბლების მონაწილეობით. დავაჯილდოვებთ ბორჯომის საპატიო მოქალაქეებს“, - განაცხადა ბორჯომის მერმა.

დღის ბოლოს დღესასწაულს ფოიერვერკი დაასრულებს. ზეიმს დაესწრებიან საქართველოს სხვადასხვა კუთხიდან მოწვეუული სტუმრები და უცხოელი ვიზიტორები.