ტილო, რომელიც გერმანიის კანცლერ ანგელა მერკელს საქართველოს პრემიერ-მინისტრმა საჩუქრად გადასცა, ქუთაისში მცხოვრები კერძო პირის მფლობელობაში იყო.

როგორც „ინტერპრესნიუსს“ მთავრობის ადმინისტრაციაში განუცხადეს, ნამუშევარი წარმოადგენს პიეტრო ფრანჩესკო ჩიტადინის (1616-1681) ფერწერას სახელად „ნატურმორტი კურდღლით“ და შესრულებულია ზეთის საღებავით ტილოზე.

მათივე ინფორმაციით, ტილო საქართველოს ხელისუფლებას კერძო პირმა უსასყიდლოდ გადასცა, რომელიც მან თავის მხრივ, კერძო კოლექციონერისგან შეისყიდა. 

მე-17 საუკუნის ფერწერული ტილო დრეზდენის გალერეის ექსპონატად ირიცხება და აქამდე დაკარგულად ითვლებოდა.