პარლამენტის თავდაცვისა და უსაფრთხოების კომიტეტის თავმჯდომარე ირაკლი სესიაშვილი პრეზიდენტის უარს უზენაესი სასამართლოს თავმჯდომარის კანდიდატურის წარდგენაზე "პოლიტიკურ უსუსურობას" უწოდებს. მისი თქმით, გიორგი მარგველაშვილს საპრეზიდენტო ვადა გასდის და დადგა იმის წინაშე, რომ საკუთარი საკონსტიტუციო ვალდებულება შეასრულოს.
"ამ მომენტში მან დაინახა, რომ მის მიმართ ნდობა არ არსებობს არც უმრავლესობაში, არც უმცირესობაში, არც საზოგადოებაში. მან ვერ შეძლო კანდიდატის წარდგენა და ცდილობს საბაბად მოიყვანოს, რომ უმრავლესობა არ დაუმტკიცებს კანდიდატურას და მას აპრიორი არ წარადგენს. არაერთი შემთხვევა ყოფილა, პრეზიდენტს წარმოუდგენია კანდიდატურა, არ დაგვიმტკიცებია, შემდეგ თავიდან წარმოუდგენია და დაგვიმტკიცებია. ეს ის ნათელი მაგალითია, როდესაც ის თავის პოლიტიკურ უსუსურობას ავლენს",- აღნიშნა სესიაშვილმა.