რამდენიმე სადამკვირვებლო ორგანიზაცია ცესკო-ს „რუსთავი 2“-ზე გასული ინფორმაციის გადამოწმებას სთხოვს. „ადგილობრივი დამკვირვებელი არასამთავრობო ორგანიზაციები: „დემოკრატიულ ინიციატივათა საერთაშორისო ცენტრი“, „ინსტიტუციური განვითარებისა და მონიტორინგის ცენტრი“ და ახალგაზრდული ცენტრი „ჩვენი თაობა 1921“ მოვუწოდებთ ცენტრალურ საარჩევნო კომისიას, დროულად მოახდინოს დღეს ტელეკომპანია „რუსთავი 2“-ის „კურიერის“ 12 - საათიან გამოშვებაში გავრცელებულ ინფორმაციაზე რეაგირება.
აღნიშნულ სატელევიზიო მასალაში გაჟღერდა, რომ საოლქო და საუბნო კომისიის დონეზე წევრთა შერჩევა ხორციელდება მპგ ,,ქართული ოცნება- დემოკრატიული საქართველოს" ადგილობრივი-რაიონული შტაბებიდან.
დაუყოვნებლივ მოვითხოვთ, აღნიშნული ინფორმაციის გადამოწმებას, ჩანაწერების ავთენტურობის დადგენას და სათანადო რეაგირებას, რათა ამ ყოველივემ არ მოახდინოს ნეგატიური ზეგავლენა საარჩევნო გარემოზე“, - ნათქვამია რამდენიმე სადამკვირვებლო ორგანიზაციის განცხადებაში.