„თამბაქოს კონტროლის ალიანსის“ ინფორმაციით, ბათუმის საავტორო კინოს მე-13 საერთაშორისო კინოფესტივალის ორგანიზატორები "რეკლამისა" და "თამბაქოს კონტროლის" კანონების მოთხოვნებს არღვევენ. ამის შესახებ ალიანსის განცხადებაშია აღნიშნული.

მათივე ინფორმაციით, კინოფესტივალის ოფიციალურ ვებ-გვერდზე განთავსებულია თამბქოს ნაწარმის რეკლამა.

„ბათუმის საავტორო კინოს მე-13 საერთაშორისო კინოფესტივალის ოფიციალურ ვებ-გვერდზე http://biaff.org/ge/ განთავსებულია თამბაქოს ნაწარმის რეკლამა, რომელიც შესაძლოა, ჩვენთვის საპატივცემულო ხელოვანთა მხრიდან თამბაქოს კონტროლის რეგულაციების საწინააღმდეგო დემარშიც იყოს. უცნობია ზუსტად რას ემსახურება ფესტივალის ორგანიზატორების, მარკეტოლოგების და სარეკლამო აფიშაზე გამოსახულ პირთა აშკარად ცინიკური დამოკიდებულება, მაგრამ ფაქტია, სარეკლამო ბანერზე ასახული სურათი შინაარსობრივად კანონსაწინააღმდეგოა და შეესაბამება არა კინოს, ან ზოგადად სამსახიობო ხელოვნებას, არამედ თამბაქოს მოხმარების პოპულარიზაციას და მოწევის პროპაგანდას. გაურკვეველია კინოს და ზოგადად, სამსახიობო სფეროს წარმომადგენლების პროტესტის მიზეზი. რის წინააღმდეგ ილაშქრებენ, რა აღაშფოთებთ მათ? კანონის მიხედვით, თამბაქოს დემონსტრირება ფილმებში არ იკრძალება. თუ კადრებში მოწევის სცენებია, მხოლოდ ფილმის ჩვენების დასაწყისში და ბოლოს სავალდებულოა მოკლე სამედიცინო გაფრთხილების გამოქვეყნება. ნუთუ ამ ტიპის რეგულაცია აღაშფოთებთ კინოსა და თეატრის სფეროს წარმომადგენლებს? იმ ხალხს, ვინც საზოგადოებისთვის, მომავალი თაობებისთვის ჯანსაღი ცხოვრების წესის პოპულარიზაციას უნდა ეწეოდეს? ნუთუ მათ მსგავსი სოციალური ვალდებულება არ აქვთ, მაგრამ ნებისმიერ დროს შეიძლება გახდნენ ერთ-ერთი მკვლელი ბიზნესის, თამბაქოს ინდუსტრიის სარეკლამო იარაღი?“- ნათქვამია განცხადებაში.

ალიანსი კომუნიკაციების მარეგულირებელ კომისიას ფაქტზე რეაგირების და შესაბამისი ზომების გატარების მიზნით მიმართავს.

„აღნიშნულ ბანერზე ფესტივლის ორგანიზატორები არღვევენ "რეკლამისა" და "თამბაქოს კონტროლის" კანონების მოთხოვნებს. ამიტომაც კომუნიკაციების მარეგულირებელ კომისიას ფაქტზე რეაგირების და შესაბამისი ზომების გატარების მიზნით მივმართავთ. ასევე, მოვითხოვთ ფესტივალის ორგანიზატორების განმარტებას, რას ემსახურებოდა მათი მხრიდან ასეთი პოსტერის დემონსტრირება. გონივრული ეჭვი გვაქვს, ამ ყველაფრის უკან იდგეს თამბაქოს ინდუსტრია, რომელიც გარკვეული ღონისძიებების დაფინანსების სანაცვლოდ, სხვადასხვა საშუალებით ცდილობს თამბაქოს კონტროლის კანონის დისკრედიტაციას, რომელიც მოსახლეობის აბსოლუტური უმრავლესობისთვის მისაღებია და სანიმუშოდ სრულდება. ბანერის შესახებ ინფორმაცია ფესტივალის მონაწილეთა ერთმა ჯგუფმა შეგვატყობინა კითხვით, როდის უნდა აიკრძალოს ეს „სვეცკი ქაჯობა“? მათი ასეთი მიდგომა მიანიშნებს, რომ თამბაქოს ინდუსტრია ყველას ვერ იყიდის, პროგრესის წინააღმდეგ ხელოვნების სფეროს წარმომადგენლების გალაშქრება კი მხოლოდ ვულგარულად თვალშისაცემია“, - ნათქვამია „თამბაქოს კონტროლის ალიანსის“ განცხადებაში.