გიორგი მარგველაშვილმა იაპონიის საგარეო საქმეთა მინისტრს საქართველოს სუვერენიტეტის მხარდაჭერისთვის მადლობა გადაუხადა

საქართველოს პრეზიდენტი გიორგი მარგველაშვილი იაპონიის საგარეო საქმეთა მინისტრს ტარო კონოს შეხვდა. როგორც „ინტერპრესნიუსს“ პრეზიდენტის ადმინისტრაციის პრესსამსახურიდან აცნობეს, გიორგი მარგველაშვილმა იაპონიის საგარეო საქმეთა მინისტრის ტარო კონოს საქართველოში ვიზიტს ისტორიული უწოდა და აღნიშნა, რომ იაპონიიდან პირველი ასეთი მაღალი დონის ვიზიტი საქართველოსა და იაპონიას შორის არსებულ მეგობრულ ურთიერთობებს კიდევ უფრო გააღრმავებს და განავითარებს. აღინიშნა, რომ ვიზიტი საქართველოს მიმართ იაპონიის მხრიდან მაღალ დონეზე გამოვლენილ მნიშვნელოვან მხარდაჭერას ადასტურებს.

შეხვედრისას მხარეებმა ორ ქვეყანას შორის ეკონომიკური თანამშრომლობის მნიშვნელობაზე ისაუბრეს და აღინიშნა, რომ იაპონიის მთავრობა საერთაშორისო თანამშრომლობის სააგენტოს მეშვეობით, საქართველოს შეღავათიანი სესხის სახით ფინანსურ რესურსს გამოუყოფს, რომელიც აღმოსავლეთ-დასავლეთის ჩქაროსნული ავტომაგისტრალის ერთ-ერთი რთული მონაკვეთის საავტომობილო გზის მშენებლობას მოხმარდება.

როგორც შეხვედრისას აღინიშნა, უმაღლესი დონის ვიზიტების გააქტიურება მნიშვნელოვანი წამახალისებელი ფაქტორია იაპონური ბიზნესსექტორისათვის განიხილონ საქართველო, როგორც მიმზიდველი საინვესტიციო მიმართულება.

საუბარი შეეხო საქართველოს ოკუპირებულ ტერიტორიებს და გიორგი მარგველაშვილმა მადლობა გადაუხადა იაპონიის საგარეო საქმეთა მინისტრს საქართველოს სუვერენიტეტის, ტერიტორიული მთლიანობის და საქართველოს ევროპულ და ევროატლანტიკურ სტრუქტურებში ინტეგრაციის კუთხით იაპონიის მხარდაჭერისათვის.

ტარო კონომ გიორგი მარგველაშვილს დაბადების დღის აღსანიშნავად იაპონური ტრადიციული ტორტი გადასცა.

მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს