საქართველოს რეგიონული განვითარებისა და ინფრასტრუქტურის სამინისტროს, საავტომობილო გზების დეპარტამენტი ჟინვალი-ლარსის საავტომობილო გზის ქვეშეთი-კობის მონაკვეთის მშენებლობის პროექტის გარემოზე ზემოქმედების შეფასების პროცესის ფარგლებში, 7 სექტემბერს საკონსულტაციო შეხვედრას გამართავს.
როგორც „ინტერპრესნიუსს“ გზების დეპარტამენტიდან აცნობეს, შეხვედრა მაღალი საზოგადოებრივი ინტერესიდან გამომდინარე, დუშეთის მუნიციპალიტეტის სოფელ ქვეშეთის ნაცვლად, უფრო დიდ დარბაზში, კერძოდ, მლეთაში მდებარე საჯარო სკოლის შენობაში ჩატარდება. შეხვედრაში მონაწილეობის მიღება, ადგილობრივ მოსახლეობასთან ერთად, ყველა დაინტერესებულ პირს შეუძლია.
აღსანიშნავია, რომ შეხვედრის მიზანია დაგეგმილ სამუშაოთა ზემოქმედების არეალში მოქცეული ადგილობრივი მოსახლეობის ინფორმირება.