სლოვენიის პოლიციამ საკონსტიტუციო წყობის ძალადობრივი დამხობის მომზადების ბრალდებით ორი პირი დააკავა. ამის შესახებ უწყება „ტვიტერის“ საკუთარ გვერდზე წერს.

„პოლიციამ დღეს საკონსტიტუციო წყობის ძალადობრივი დამხობის მომზადებაში ეჭვმიტანილი ორი პირი დააკავა. კრიმინალისტებმა ხუთ საცხოვრებელ მისამართზე ჩხრეკა ჩაატარეს, საქმეს ქალაქ მარიბორის პროკურატურა იძიებს“, - ნათქვამია პოლიციის განცხადებაში.

სლოვენიური მედიის ინფორმაციით, დაკავებულები არიან პრეზიდენტობის ყოფილი კანდიდატი, ულტრაპატრიოტული ორგანიზაცია „შტაერის გვარდიის“ ლიდერი ანდრეი შიშკო და მისი თანამოაზრე. აღსანიშნავია, რომ 2017 წლის საპრეზიდენტო არჩევნებზე შიშკომ ხმათა 2,21% მიიღო.

გასულ კვირას სოციალურ ქსელებში გავრცელდა ფოტო და ვიდეომასალა, რომელზეც სამხედრო უნიფორმაში გამოწყობილი პირები არიან ასახულები. ისინი ხელისუფლებას „ცხელი შემოდგომის“ მოწყობას და „სლოვენიის ვენესუელად ქცევას“ ჰპირდებოდნენ. გამოძიების ვერსიით, ამ ჯგუფს სწორედ ანდრეი შიშკო ხელმძღვანელობდა.