საზღვარგარეთ საქართველოს მოქალაქეების ლეგალურ დასაქმებასთან დაკავშირებით დავით ბაქრაძე ბრიუსელში შეხვედრებს განაგრძობს. როგორც „ინტერპრესნიუსს“ „ევროპული საქართველოდან“ აცნობეს, პარტიის პრეზიდენტობის კანდიდატი ამ საკითხთან დაკავშირებით დღეს ევროპარლამენტარ პეტრას აუსტრევიჩუსს შეხვდა.
ევროპარლამენტარის წევრის განცხადებით, საქართველო ევროკავშირის მყარი პარტნიორია და ევროკავშირის წევრ ქვეყნებში საქართველოს მოქალაქეებს აუცილებლად უნდა მიეცეთ ლეგალური დასაქმების საშუალება.
„დავით ბაქრაძესთან ძალიან გუწრფელი და საინტერესო საუბარი გვქონდა. ჩვენ დაინტერესებული ვართ იმით, თუ რა ხდება საქართველოში, რადგან ეს ქვეყანა ჩვენი პარტნიორია. დავით ბაქრაძეს ძალიან საინტერესო და ახალი იდეა აქვს, რომ ევროკავშირის წევრ ქვეყნებში საქართველოს მოქალაქეებს დასაქმების შესაძლებლობა მიეცეთ. ევროკავშირს სჭირდება ისეთი სამუშაო კადრები, როგორიც თქვენ გყავთ. ეს ადამიანები იმუშავებენ აქ და შემდეგ თანხას თქვენს ქვეყანაში გააგზავნიან. პოლიტიკაში ყოველთვის საჭიროა ახალი იდეები, ეს სწორედ ასეთია“, - განაცხადა პეტრას აუსტრევიჩუსმა.