ჩვენ დარწმუნებული ვართ, რომ ევროპარლამენტის საბოლოო ანგარიში პოზიტიური იქნება, - ამის შესახებ პარლამენტის თავმჯდომარემ ირაკლი კობახიძემ ევროპარალმენტის დასკვნასთან დაკავშირებით ჟურნალისტებთან საუბრისას განაცხადა. კერძოდ, ჟურნალისტები დაინტერესდნენ თუ როგორია მოლოდინი ევროპარლამენტის დასკვნაზე, რომელიც საქართველოს ასოცირების ხელშეკრულებით ნაკისრი ვალდებულებების შესახებ უნდა იყოს გამოქვეყნებული.

„ჩვენ დარწმუნებული ვართ, რომ საბოლოო ანგარიში იქნება პოზიტიური. ყველა ხედავს იმ რეალობას და პროგრესს, რომელსაც ქვეყანამ მიაღწია ამ რამდენიმე წლის განმავლობაში. აქედან გამომდინარე, ჩვენ ველოდებით პოზიტიურ დასკვნას. ჩვენ გვაქვს კარგი ურთიერთობები ყველა პარტიასთან, რომელიც არის საერთაშორისო დონეზე, როგორც მემარცხენე ასევე მემარჯვენე პარტიებთან. მთავარი არის ჭეშმარიტება და ჭეშმარიტება საუბრობს იმაზე, რომ პროგრესი გვაქვს ყველა მიმართულებით“, - განაცხადა ირაკლი კობახიძემ.