კონკურენციის სააგენტოს თავმჯდომარე, ნოდარ ხადური მონღოლეთის საგარეო საქმეთა მინისტრს დამდინგ ცოგტბაატარს შეხვდა. როგორც „ინტერპრესნიუსს“ კონკურენციის სააგენტოს პრესსამსახურიდან აცნობეს, შეხვედრაზე მხარეებმა საქართველოში და მონღოლეთში მიმდინარე პროცესებსა და ეკონომიკურ რეფორმებზე ისაუბრეს.
მონღოლეთის საგარეო საქმეთა სამინისტროს საქმიანობის სფეროში შედის ეკონომიკური პოლიტიკის, მათ შორის, საგარეო ვაჭრობის პოლიტიკის შემუშავება და განხორციელება. მონღოლეთის საგარეო საქმეთა მინისტრმა საუბარში ხაზი გაუსვა საქართველოს მიღწევებს კორუფციასთან ბრძოლაში, ეკონომიკის რეფორმირებასა და ტურიზმის განვითარებაში. მისი განცხადებით მონღოლეთში დიდი ინტერესით აკვირდებიან საქართველოში მიმდინარე პროცესებს.
„მონღოლეთში უყვართ ქართული კულტურა, ბოლო დროს სულ უფრო დიდი პოპულარობით სარგებლობს ქართული ღვინო, მინერალური წყლები. საქართველოსა და მონღოლეთს შორის საქმიანობის გაღრმავების დიდი შესაძლებლობები არსებობს“, - აღნიშნულია კონკურენციის სააგენტოს პრესსამსახურის მიერ გავრცელებულ ინფორმაციაში.
მონღოლეთის საგარეო საქმეთა მინისტრთან შეხვედრას ესწრებოდა აზია-წყნარი ოკეანის ქვეყნების სავაჭრო-სამრეწველო პალატების კონფედერაციის პრეზიდენტი, ჯემალ ინაიშვილი. მონღოლეთში ვიზიტის ფარგლებში, ნოდარ ხადურმა მონაწილეობა მიიღო, როგორც ორმხრივ, ისე მრავალმხრივ ღონისძიებებში. ის ასევე დაესწრო გამოფენის "Ulaanbatar partnership 2018" გახსნას. მონაწილეობდა საერთაშორისო კონფერენციის "აღმოაჩინე ბიზნეს შესაძლებლობები" მუშაობაში.