გაერთიანებული ოპოზიციის "ძალა ერთობაშია" საპრეზიდენტო კანდიდატი გრიგოლ ვაშაძე საჩხერეში იმყოფებოდა, სადაც ადგილობრივებს შეხვდა და მათ პრობლემებს გაეცნო.

„მოსახლეობა, სხვა რეგიონების მსგავსად, აქაც ივანიშვილის ხელისუფლებისგან მოტყუებული და მიტოვებულია. ისინი თანადგომას ითხოვენ. გრიგოლ ვაშაძემ მათ დახმარება აღუთქვა და საარჩევნო პროგრამის ის ნაწილი გააცნო, რომელიც ხელფასების, პენსიის ზრდას ითვალისწინებს“, - ნათქვამია პრესრელიზში.

"ხელისუფლებაში მოსვლისთანავე მოძრაობა "ძალა ერთობაშია" გაზრდის პენსიას 400 ლარამდე, მასწავლებლის ხელფასს - 1000 ლარამდე, პოლიციელის ხელფასს - 2000 ლარამდე. ჩვენ გამოვაცხადებთ ორწლიან მორატორიუმს უსამართლო საბანკო თუ მიკროსაფინანსო ორგანიზაციების კრედიტების გადახდაზე და ყველა ვალი დაანგარიშდება 2012 წელს არსებული ლარის კურსით (1.66)", - განაცხადა ვაშაძემ.